Kreu i Grupit Parlamentar të Partisë Demokratike, Gazmend Bardhi ka reaguar ditën e sotme lidhur me sekuestrimin e pronave të investitorit strategjik, Pëllumb Gjoka. Përmes një postimi në rrjete sociale Bardhi shkruan se tashmë është e qartë arsyeja përse kryeministri Rama dhe mazhoranca refuzuan ngritjen e komisionit hetimor për investimet strategjike.
Bardhi shprehet se shumë prej këtyre investimve nuk lidhen me zhvillimin por me paratë e pista, teksa paralajmëron se shumë shpejt edhe për Kryeministrin Edi Rama do të vijë dita kur do të trokas në dyert e drejtësisë.
Postimi i plotë:
“Sekuestrimi i pronave të disa investitorëve strategjikë e vendos Edi Ramën në pozitën e një kryeministri që ka abuzuar rëndë me pushtetin. Përveç miqësisë me Kryeministrin, qartësisht duket se kriteri mbi të cilin Edi Rama i ka shpallur investitorët strategjikë ka qenë grabitja e pronave publike e private prej tyre!
Një kryeministër i ndershëm nuk mund të shpallë investitorë strategjikë persona që kanë përfituar pronat në Bregdet përmes fallsifikimit. Një kryeministër i ndershëm nuk mund të shpallë investitorë strategjikë trafikantë droge dhe porositës vrasjesh me pagesë. Tani bëhet krejt e qartë arsyeja përse Edi Rama dhe maxhoranca e tij refuzuan ngritjen e Komisionit Hetimor për investimet strategjike. Shumë prej tyre nuk kanë të bëjnë me zhvillimin, por me pastrimin e parave nga punët e pista. Me këto para kanë blerë edhe fallsifikimin e pronave, ku kanë ngritur dhe po ngrenë perandorinë e krimit dhe të korrupsionit. Mbi këto vendime, Edi Rama ka vendosur firmën e tij dhe nuk duhet të jetë e largët dita, kur ai do të duhet të përballet me drejtësinë.”
