Tre pasuri të llojit “Pyll” me sipërfaqe totale 390 000 m2 të lidhura me investitorin strategjik Pëllumb Gjoka janë vënë nën sekuestro.
Masa e sekuestros preventive vjen në kuadër të procedimit penal të njohur si “Metamorfoza”, nisur më herët gjatë vitit dhe është vendosur nga Gjykata e Posaçme më 23 Tetor, me kërkesë të SPAK.
“Nga hetimet e kryera ka dyshime të arsyeshme të bazuara në prova se pasuritë e lartpërmendura, janë në pronësi të personave dhe shoqërive të mësipërme janë fituar nëpërmjet falsifikimit të dokumenteve të kryer nga shtetasi Pëllumb Gjoka., në bashkëpunim me persona të tjerë”, njofton SPAK.
Vendimi është është ekzekutuar nga Prokuroria e Posaçme në bashkëpunim me Agjencinë e Administrimit të Pasurive të Sekuestruara dhe të Konfiskuara, ndërkohë hetimet vijonë, shtojnë të njëjtat burime.
Pasuritë e sekuestruara janë:
- Pasuria e llojit Pyll, me sipërfaqe 113.500 m2, e ndodhur në Pulaj- Plazh, Velipojë, Shkodër, regjistruar në emër të një shoqërie tregëtare …….;
- Pasuria e llojit Pyll, me sipërfaqe 61.470 m2, e ndodhur në Pulaj- Plazh, Velipojë, Shkodër, regjistruar në emër të një shoqërie tjetër tregëtare ……..;
- Pasuria e llojit Pyll, me sipërfaqe 215.030 m2, e ndodhur në Pulaj- Plazh, Velipojë, Shkodër, regjistruar në emër të shtetasit K.Gj.
Investitor Strategjik
Gjoka është akuzuar nga opozita si i përfshirë në blerje votash në Shkodër, në favor të Partisë Socialiste. I angazhuar më parë në lojërat e fatit, dy vite më parë, kompanisë së tij “Imperial Group”, iu dha statusi i investitorit strategjik për ndërtimin e një resorti turistik në Velipojë, me një vlerë prej 52 milion eurosh.
Konkretisht, më 15 Korrik 2021, Komiteti i Investimeve Strategjike, nën drejtimin e kryeministrit Edi Rama, miratoi statusin e investitorit për projektin “Silver Sand Resort”, Subjekti aplikues është “Imperial Group”, në pronësi të Pëllumb Gjokës, si edhe Lekë e Alida Gjokës.
Sipas vendimit të nënshkruar nga Edi Rama, kompania e Gjokës merr përsipër që të shpenzojë 52 milionë euro, për ndërtimin e dy strukturave hoteliere dhe një numër të konsiderueshëm apartamentesh e viletash, në zonën e bregut të Velipojës, në Shkodër.
Sipas vendimit, projekti parashikohet të zhvillohet në Zonën Kadastrale 3072, Bashkia Shkodër, në një sipërfaqe totale prej 113.500 m2, pronë private, ku strukturat do të zënë një sipërfaqe afërsisht 14.496 m2.
Dosja “Metamorfoza”, Gjoka porositi vrasje
Në Korrik 2023, Gjoka u arrestua në kuadër të aksionit policor të pagëzuar “Metamorfoza”, që goditi një grup kriminal dhe çoi në pranga dy zyrtarë policie, ndërsa akuza penale u ngritën ndaj emrave të njohur të kronikës së zezë si Behaj Bajri apo Ervis Martinaj.
Mbi të rëndon akuza “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”. Gjoka akuzohet gjithashtu edhe për dy raste të veprës penale “Sigurimi i kushteve dhe i mjeteve materiale për të kryer vrasje” ndaj si dhe për korrupsion aktiv të prokurorit.
Sipas hetimeve, Gjoka urdhëroi vrasjen e Kleant Musabelliut, ish-punonjës i Burgjeve. Ky i fundit, në 2017, pas një debati e ka plagosur Pëllumb Gjokën me një plumb në këmbë, në zonën e Pazarit të ri në kryeqytet.
Sipas SPAK, për planin e vrasjes së Musabelliut Gjoka bisedon me Behar Bajrin dhe Ervis Martinaj. Pas diskutimeve për planin e pagesës, për një moment flitet dhe për një shkëmbim vrasjesh, ku Bajri do kryente vrasjen e Gjin Boriçit për llogari të Gjokës dhe Vis Martinaj. Ndërsa Martinaj do realizonte më pas vrasjen e Kleant Musabelliut për llogari të Pëllumb Gjokës. Këto biseda thotë SPAK janë kryer gjatë vitit 2020 dhe planifikimi për të bërë vrasjen ka qenë Tirana. Ekzekutimi i Musabelliut megjithatë nuk është kryer, ndërsa ai rezulton të jetë larguar nga Shqipëria disa vite më parë.
Sipas hetimeve të prokurorisë, rezulton po ashtu se Pëllumb Gjoka është angazhuar në disa vrasje që Behar Bajri planifikonte të kryente, në sigurimin e informacioneve për lëvizjet e personave nën shënjestër.
