Tre persona u arrestuan nga policia në Gjirokastër, pasi u kapën në flagrancë duke transportuar rreth 5.25 kilogramë kanabis.
Në pranga kanë rënë shtetasit, Ylli Qëndro, Mikel Leskaj dhe Afrim Leskaj.
Blutë bëjnë me dije se 47-vjeçari, Ylli Qëndro, banues në fshatin Stjar të Delvinës po transportonte sasinë e lëndës narkotike, ndërsa dy të arrestuarit e tjerë, kontrollonin rrugën, me një automjet tjetër, për të sinjalizuar 47-vjeçarin, për prezencën e shërbimeve të Policisë.
“Gjatë operacionit, shërbimet e Policisë kanë ndaluar në vendin e quajtur “Kthesa e fshatit Kodër”, Gjirokastër, automjetin tip “Toyota Yaris”, me drejtues shtetasin Y. Q. Gjatë kontrollit në këtë automjet, shërbimet e Policisë kanë gjetur në bagazh, 5.25 kilogramë lëndë të dyshuar narkotike kanabis, që dyshohet se po transportohej për t’u shitur.
Gjithashtu, shërbimet e Policisë kanë ndaluar automjetin tip “Ford” me drejtues shtetasin M. L. dhe pasagjer shtetasin A. L., të cilët kontrollonin rrugën, me qëllim për të sinjalizuar shtetasin Y. Q., për prezencën e shërbimeve të Policisë, në rrugë”,- njoftoi më herët policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
