Nga Boldnews.al
Dallëndyshja e Kadastrës është bërë gati për SPAK! Pak ditë më parë, shpenzoi miliona euro për sistemin online, ndërsa kësaj here ka një tjetër vendimmarrje tepër të dyshimtë; nga 6 firma në garë, s’kualifikon 5 dhe tenderin ia jep ofertës më të lartë! Madje, me diferenca tepër të mëdha nga oferta më e ulët te ajo fituese, që shkojnë deri në 800 mijë euro.
Bëhet fjalë për rikonstruksionin e katit të katërt dhe të pestë të ASHK-së te “Jordan Misja”, teksa fituesi ka dalë i njëjti me atë që ka rikonstruktuar 3 katet më poshtë. Por nëse do t’ia jepte të njëjtit fitues, përse bëri tender? Aq më tepër që s’kualifikoi kë t’i dilte para vetëm e vetëm që të përfundonte aferën e nisur. Duket se Bici ka marrë hov që kur mori drejtimin e ASHK-së, teksa çdo vendimmarrje për prona të mëdha e merr te drejtoria qendrore. Ajo ka mbledhur të gjithë drejtorët e mëdhenj nën vete dhe për investitorët apo biznesmenët e mëdhenj, i merr vetë vendimet. Për popullin e thjeshtë, bën sistem online!
Sipas dokumenteve që disponon redaksia e BoldNews.al, Agjencia Shtetërore e Kadastrës ka shpallur fituesin e tenderit me objekt “rikonstruksioni për katin V dhe VI teknik të godinës së ASHK-së në rrugën ‘Jordan Misja’, Tiranë”. Kohëzgjatja e kontratës ose afati kohor për ekzekutimin është 12 muaj. Kriter i përzgjedhjes së fituesit ishte oferta ekonomikisht më e favorshme bazuar në çmim.
Në procedurë morën pjesë BOE “AD – STAR” dhe “2T” me vlerë 193.169.175 lekë pa TVSH. Firma “EDUART ÇELA” nuk ka paraqitur ofertë. “FRONTIER CONSTRUCTION” ofroi 111.309.867 lekë, ose 800 mijë euro më pak. “INERTI” ofroi 156.270.087 dhe “LIS KONSTRUKSION” e “VIANTE Konstruksion” ofruan 174.266.812 lekë. Ndërkohë, “PEPA GROUP” kishte ofertë 180.064.611 lekë.
Por, kush fitoi? Me kriterin e vendosur nga Bici duhej oferta më e ulët. Por, me vendimmarrjen e saj, fitues doli oferta më e lartë, që kishte plot 800 mijë euro më shumë sesa oferta më e ulët. Goxha aferë! Të 5-ta firmat që ofruan më pak u s’kualifikuan çuditërisht me arsye nga më banalet.
Duket se skema e Bicit ka qenë e qartë; fitues të shpallet e njëjta firmë që rikonstruktoi tre katet e para të godinës së ASHK-së te “Jordan Misja”, një tender i realizuar në vitin 2021. Sipas dokumenteve që disponon redaksia e BoldNews.al, Bici urdhëroi vartësit e saj që t’i kopsitnin letrat në mënyrë që fitues të shpallej “AD Star”, me administrator dhe pronar z. Alfred Çoma. Mësohet se kjo firmë në vitin 2021 fitoi e vetme tenderin me vlerë 315.207.533 lekë, duke u vlerësuar me 100 pikë. Ajo garoi me veten dhe u shpall fitues, ndërkohë që 2 vite më vonë merr edhe 2 milionë euro të tjera për të përfunduar rikonstruksionin.
Por nëse do e realizonte siç duhet në 2021-shin, a duhej bërë në 2023-shin? Duket se gjithçka është bërë që të favorizohej kjo firmë, nga hartimi i dokumenteve, te vlerësimi apo edhe te shpallja e fituesit. Një material i mirë hetimor, ku organet ligjzbatuese, me në krye SPAK-un mund të ndërhyjnë!
