Nga Boldnews.al
Struktura e Posaçme Anti-Korrupsion ka nën hetim ish-kryeministrin Sali Berisha për “korrupsion pasiv” dhe ndaj tij siguroi vendimin e Gjykatës së Posaçme për caktimin e masës “detyrim paraqitje”, nën dyshimet se, në kohën kur ishte kryeministër, ai ka miratuar disa VKM dhe ndryshime ligjore me karakter të përgjithshëm, nga të cilat ka përfituar dhëndri i tij, Jamarbër Malltezi.
SPAK i atribuon Berishës nenin 260 të Kodit Penal, i cili thotë: “Kërkimi ose marrja, drejtpërdrejt ose tërthorazi, i çdo lloj përfitimi të parregullt apo i një premtimi të tillë, për vete ose për persona të tjerë, dënohet me burgim nga katër deri në dymbëdhjetë vjet”.
Për SPAK-un, Berisha ka nxitur nisma ligjore dhe VKM që të përfitonte Malltezi.
Me këtë hetim, SPAK vendosi një standart të ri, por tejet të diskutueshëm, për penalizimin e zyrtarit me pozicion kryeministër për miratimin e akteve kolegjiale, të cilat afektojnë grupe të gjera shoqërore.
Me këtë “standart të ri” të SPAK-ut, duket se disa llogari duhet të bëjë edhe kryeministri aktual, Edi Rama, sa i përket lirisë së tij dhe përballjes me institucionet e drejtësisë.
Kreu aktual i qeverisë ka ndërmarrë nismën e një morie ligjesh të miratuara në Parlament apo Vendime të Këshillit të Ministrave e akte të tjera, të cilat mbajnë firmën e tij dhe që, ndryshe nga aktet që po hetohet Berisha, këto të Ramës kanë përfitues janë njerëz/individë të përveçëm.
Lista e “ligjeve dhe vedimeve me porosi” të Ramës
Më poshtë është një listë me aktet më tipike të ndërmarra nga Edi Rama, si kryeministër:
- Inceneratorët “Zoto-Mërtiri”
Qeveria e Edi Ramës dhe vetë kryeministri kanë një rol të dorës së parë në dorëzimin e kontratave koncesionare për ndërtimin e inceneratorëve në Elbasan, Fier dhe Tiranë tek dyshja Klodian Zoto-Mirel Mërtiri.
Këta personazhe nuk kishin eksperiencë dhe as kapital për të ndërtuar vepra publike me kosto koncesionare rreth 200 milionë euro dhe me përfitime që mund të arrijnë në mbi 1 miliard euro.
Kryeministri Edi Rama deklaroi publikisht se miratoi “fap e fap” të gjithë dokumentat në favor të Zoto-Mërtirit, të cilët tashmë janë në kërkim për korrupsion aktiv dhe pastrim parash në tre çështje të ndryshme në SPAK, për secilin prej koncesioneve të impianteve të plehrave.
Pra, Vendimet e kabinetit qeveritar të drejtuar nga Edi Rama ndërmorën të gjithë hapat e nevojshëm për të pasururuar dy individë specifikë, Zoton e Mërtirin.
- Ligji “Fusha”
Kryeministri Edi Rama u angazhua personalisht fuqishëm për miratimin në Parlament të ligjit që i hapte rrugën shkatërrimit të Teatrit Kombëtar dhe shndërrimit të truallit, ku ngrihej godina kult e kulturës shqiptare në kompleks kullash për llogari të biznesmenit Shkëlqim Fusha.
Ky rast përbënte tipikisht “ligjin me porosi”, kur kreu i qeverisë, njëkohësisht edhe kreu i maxhorancës, ndërmerr hapa ligjorë për t’i krijuar përfitime një individi të vetëm, biznesmenit Shkëlqim Fusha dhe kompanisë së tij, “Fusha” shpk.
Ligji personal “Fusha” u shpall antikushtetues nga Gjykata Kushtetuese, megjithëse Teatri Kombëtar u shkul nga themelet.
- Porti i Alabarit
Kryeministri Edi Rama ka marrë përsipër të gjithë autorësinë e kuadrit ligjor për të shkatërruar portin më të madh tregtar në vend, atë të Durrësit, e për ta shndërruar në kompleks rezidencial, për llogari të biznesmenit saudit, Mohamed el Alabar.
Vendimet qeveritare, ligji i posaçëm “Alabar” dhe vendimet pasuese që i dorëzojnë sipërmarrësit privat mbi 1 milionë metra katror truall publik shkojnë të gjithë në interesin financiar të biznesmeni saudit, i cili prej kohësh ka nisur të shesë “ajër” në projektin e tij “Durres Yacht Marina”.
Ky vendim personal i Ramës hedh në kosh qindra milionë euro të shpenzuara ndër vite për ndërtimin dhe mirëmbajtjen e Portit të Durrësit, si edhe shton kosto të pallogaritshme në buxhetin e Shtetit, për ndërtimin e Portit të Ri Tregtar, që mendohet se do të pozicionohet në Porto Romano.
- Xhaçka “strategjike”
Me firmën e tij, kryeministri Edi Rama ka miratuar vendimin për të shndërruar bashkëpunëtoren e tij të ngushtë, ish-ministren e Jashtme, Olta Xhaçka, në “investiture strategjike”.
Rama, si kryetar i Komitetit të Investimeve Strategjike i dha status të privilegjuar bashkëshortit të Xhaçkës, ish-deputetit socialist Artan Gaçi, për ndërtimin e një resorti në Gjilekë të Himarës.
Nuk mbaroi këtu. Rama, tanimë si kryeministër, miratoi dhënien pa kundërshpërblim të bregut para resortit të Gaçit, me qëllim që fitimet e familjes Xhaçka të shumëfishohen.
Pra, edhe në këtë rast, Vendimi i Këshillit të Ministrave është tipik nga ata që sigurojnë përfitime për persona të afërt të tij.
Ndërkohë që Berisha është marrë nën hetim për vendime të Këshillit të Ministrave me natyrë të përgjithshme dhe që ka prekur një grup të tërë shoqëror-siç janë ish-pronarët-, atëherë çfarë duhet të ndodhë me Ramën, i cili ka vendime dhe nisma ligjore për përfitimin e individëve konkretë?
Është për t’u parë se cili do të jetë standarti i SPAK-ut për këto “ligje me porosi” të Edi Ramës.
