Ashtu siç ishte e pritshme, Skënder Gjinushi është rizgjedhur për një mandat të dytë si Kryetar i Akademisë së Shkencave të Shqipërisë.
Votimi u mbajt paraditen e kësaj të premteje në Akademinë e Shkencave pa praninë e mediave dhe me dyer të mbyllura, teksa kandidati i vetëm në garë ishte vetëm Gjinushi. Media nuk u njoftua për procesin e votimit dhe arsyetimi që iu dha gazetarëve prej Akademisë ishte përmes statutit të saj, me pretendimin se në mungesë të debatit, mosprania e medies është legjitime.
Zgjedhjet u mbajtën pa rivalë dhe pa fushatë brenda ose jashtë Akademisë së Shkencave, me opinionin shkencor, ku pjesëmarrësit në garë të shpalosnin platformat dhe idetë e tyre.
Këtë herë, Skënder Gjinushi u zgjodh me 51 vota pro, më shumë se nga mandati i parë ku vetëm 35 akademikë votuan pro tij, ku edhe atëhere kandidonte i vetëm. I vetmi që u deklarua kundër procedurave të sotme ishte akademiku Artan Fuga.
Akademiku Vasil Tole i cili rikandidoi për postin e zv.kryetarit, u zgjodh me 50 vota pro dhe 3 kundër. Në komisionin e Votimit për mbajtjen e zgjedhjeve në Akademi, ishin anëtarë akademikët Adem Bunguri, Mimoza Hafizi dhe Anila Hodaj.
Në një prononcim për mediat pas rizgjedhjes si kryetar i “Shkencave”, Gjinushi e konsideroi si proces normal dhe demokrat, edhe pse nuk kishte as rivalë, as fushatë dhe zgjedhjet u mbajtën me dyer të mbyllura.
“Secili ka kandidat ka në dorë veten e vet. Gjithkush nga Akademikët kanë qenë i ftuar dhe jo vetëm se ligji ta jep të drejtën. Në një shoqëri demokratike, lejohet kandidimin e lirë, kur pengohet është problem. Ende se keni kuptuar që në institucionet si Akademia e Shkencave, dinë të vlerësojnë se kush do të jetë ekipi drejtues dhe kolaudohet se cila reformë, cila alternativë do duhet mbështetur? Kur merr shume vota në mandat të dytë i bie që ke punuar shumë mirë. Garë është se votohet po jo. Vazhdoni i bini një kambanë. Dinë se ç’bëjnë 53 akademikë. Mos bëni sikur jeni më të mençur se akademikët.” – tha Gjinushi.
Kujtojmë se në seancën e fundit parlamentare të sesionit të kaluar, PS miratoi me 70 vota pro, 23 kundër dhe 2 abstenime pr. ligjin për Akademinë e Shkencave, i konsideruar ndryshe si ligji “Gjinushi”.
Nga propozimet e dy deputetëve socialistë Ismet Beqiraj dhe Petro Koçi, kryetarit do t’i lejohej një mandat i dytë, pra u hoq termi “por jo radhazi” në nenin 3 rë ligjit aktual, si dhe u hoq kufizimi i moshës 75 vjeç. Këto ndryshime dukeshin si “me porosi” nga vetë Gjinushi, pasi i hapën rrugën rizgjedhjes së tij në krye të Akademisë së Shkencave, teksa kjo është një praktikë që bie ndesh me parimin e shtetit të së drejtës, ku ligjet nuk i përshtaten një indidivi apo një grupi njerëzish.
Skënder Gjinushi e drejton Akademinë e Shkencave që prej 24 Majit të vitit 2019.
