Deputetja e Partisë Demokratike, Albana Vokshi i është përgjigjur deklaratës së deputetit Erion Braçes, i cili e cilësoi “të tmerrshme”, pas tensioneve të krijuara në sallën e Kuvendit paraditen e sotme.
Në një reagim në rrjetet sociale, Vokshi shprehet se i tmerrshëm është korrupsioni i qeverisë, duke akuzuar kryeministrin Edi Rama dhe ish-ministrat Ilir Beqja, Ogerta Manastirliu e Frida Krifca.
Ajo po ashtu shprehet se deputetët e opozitës nuk tremben e nuk kërcënohen nga socialistët, teksa thekson se rezistenca e tyre vazhdon.
“Përgjigje për Erjon Bracen: I tmerrshëm është korrupsioni i qeverisë suaj. I tmerrshëm është korrupsioni i Edi Ramës, Ilir Beqajt, Ogerta Manastirlliut, Frida Krifcës, apo edhe Fredi Kokoneshit të Divjakës. Nuk është e tmerrshme qëndresa e opozitës për të kërkuar të drejtën kushtetuese. E tmerrshme është si shkelet kushtetuta nga ana juaj! As na blini, as na mbani peng, as na intimidoni, as na frikësoni, as na kërcënoni, as na shantazhoni dot. Rezistenca vazhdon!!!”- shkruan Vokshi.
