Të paktën gjashtë persona kanë humbur jetën pasi Rusia ka lëshuar qindra raketa dhe dronë kundër infrastrukturës energjetike dhe banesave në Ukrainë gjatë natës.
Një sulm mbi një pallat në qytetin Dnipro vrau dy persona dhe plagosi 12 të tjerë, ndërsa tre të tjerë u vranë në Zaporizhia.
Në total, 25 zona në të gjithë Ukrainën, përfshirë edhe kryeqytetin Kiev, u goditën, duke lënë shumë rajone pa energji elektrike dhe ngrohje.
Kryeministrja Yulia Svyrydenko njoftoi në Telegram se objekte të rëndësishme energjetike u dëmtuan në rajonet Poltava, Kharkiv dhe Kiev, ndërsa po punohet për rikthimin e furnizimit me energji.
Nga ana tjetër, Ministria e Mbrojtjes e Rusisë tha se forcat e saj kishin rrëzuar 79 dronë ukrainas gjatë natës.
Forcat ajrore të Ukrainës raportuan se Rusia kishte lëshuar më shumë se 450 dronë shpërthyes dhe 45 raketa, prej të cilave 9 raketa dhe 406 dronë janë rrëzuar.
Ministria ukrainase e Energjisë konfirmoi ndërprerje të energjisë në rajonet Dnipropetrovsk, Chernihiv, Zaporizhia, Odesa dhe Kirovohrad, por theksoi se punimet për riparimin janë në vijim.
Sipas Svyrydenko-s, objektet e infrastrukturës kritike janë lidhur sërish me rrjetin, ndërsa furnizimi me ujë po mbahet në funksion me gjeneratorë.
Rusia pretendon se sulmet e saj ndaj infrastrukturës energjetike synojnë objektiva ushtarake ukrainase.
Sulmet e përsëritura ndaj rrjetit energjetik të Ukrainës përpara dimrit janë tashmë një pjesë e njohur e këtij konflikti. Megjithatë, zyrtarët në Kiev janë gjithnjë e më të shqetësuar se Moska nuk po synon vetëm të godasë moralin e popullit ukrainas, por edhe të paralizojë ekonominë e vendit duke shembur rrjetin e tij energjetik.
Analistët thonë se ky është dimri i katërt i pushtimit të plotë rus dhe do të jetë një provë e rëndësishme për qëndrueshmërinë mbrojtëse të Ukrainës.
Presidenti Volodymyr Zelensky deklaroi se sulmet tregojnë se nuk duhet të ketë “asnjë përjashtim” nga sanksionet perëndimore ndaj sektorit energjetik rus, si mënyrë për të ushtruar presion ndaj Moskës.
Sulmet me raketa ndodhën vetëm disa orë pasi SHBA përjashtoi Hungarisë për 1 vit nga kufizimet për blerjen e naftës dhe gazit rus.
Në tetor, SHBA kishte vendosur në listën e zezë dy nga kompanitë më të mëdha të naftës ruse, duke paralajmëruar sanksione ndaj atyre që blejnë prej tyre.
Por të premten, gjatë vizitës në Uashington të kryeministrit hungarez Viktor Orbán — aleat i ngushtë personal dhe politik i Donald Trump — presidenti amerikan njoftoi përjashtimin për Budapestin.
Në një mesazh në Telegram, Zelensky tha se sulmet e natës “tregojnë se presioni ndaj Rusisë duhet të rritet”.
“Ndërsa Moska godet infrastrukturën energjetike — për të dëmtuar njerëzit e zakonshëm përpara dimrit — duhet të ketë një reagim me sanksione ndaj gjithë sektorit energjetik rus, pa asnjë përjashtim,” theksoi ai, duke shtuar se Ukraina pret “vendime konkrete nga SHBA, Evropa dhe vendet e G7-s.”
