Mazhoranca në Konferencën e Kryetarëve rrëzoi një tjetër kërkesë të opozitës për komision hetimor.
Grupi Parlamentar i PD depozitoi në Kuvend kërkesën për ngritjen e komisionit hetimor për parandalimin e konfliktit të interesit në ushtrimin e funksioneve publike. Në kërkesën e firmosur nga 35 deputetë të PD, theksohet se parlamenti duhet të kryejë hetime mbi veprimet institucionale të zyrtarëve që kanë marrë vendime edhe pse kanë qenë në kushtet e konflikt të interesi.
Pas mbledhjes, ishte deputetja demokrate Jorida Tabaku, e cila konfirmoi vendimin e kolegëve të mazhorancës për të rrëzuar kërkesën e opozitës.
“PS përsëri refuzoi të drejtën që opozita të ngrejë komision hetimor. Në komisionin e tretë radhazi që nga Shtatori ne kemi kërkuar që pakica parlamentare të ushtrojë atë funksion kushtetues që i takon me ligj, por edhe të bazuar mbi vendimet e Gjykatës Kushtetuese për të drejtën e ngritjes së një komisioni hetimor. Askush s’mund të kontrollojë të drejtën e opozitës për kontroll dhe balancën e pushteteve. Po kthehet në një normë që mazhoranca përveç super pushtetit që ka, tashmë kontrollon dhe vendos dhe për të drejtën e opozitës. Këtë vit nuk kemi pasur asnjë komision hetimor, ky i fundit ishte për të parandaluar konfliktin e interesit në vendimmarrje të zyrtarëve të lartë”, tha ajo në një prononcim për gazetarët.
Disa ditë më parë, socialistët rrëzuar edhe dy kërkesa të opozitës për ngritje të komisioneve hetimor për vjedhjen e dyshuar të të dhënave nga sistemi TIMS si dhe për 4 kontratat e koncesionit në fushën e shëndetësisë.
