Greqia voton këtë të dielë për zgjedhjet bashkiake dhe rajonale. Edhe në këto zgjedhje, sondazhet paraprake para hapjes së kutive të votimit folën për një fitore bindëse të partisë në pushtet, Demokracia e Re udhëhequr nga kryetari Kiriakos Mitsotakis.
Kryeministri i Greqisë votoi në Kifisi paraditen e së dielës, ku u prit nga kandidati për kryetar të rajonit të Atikisë, Nikos Hardalias. Ai siguroi se qeveria e tij do të vijojë të mbështesë financiarisht pushtetarët e ardhshëm lokalë.
“Sot është festa e madhe e vetëqeverisjes, po votojmë për kryetarë bashkish, për rajone, për një përditshmëri më të mirë, për shërbime cilësore të mirëqenies dhe shëndetësisë, për dinamikë zhvillimi. Demokracia e Re nuk e ka fshehur se i ka dhënë dimension politik zgjedhjeve për 13 Qarqet e vendit dhe tre bashkitë e mëdha. Kjo është arsyeja pse ne duam që kryesisht në rajone të zgjedhim njerëz që përqafojnë vizionin tonë për një Greqi më të mirë me dinamikë të fortë zhvillimi. Qytetarët do të zgjedhin lirshëm pushtetarët lokalë të cilët do t’i gjykojnë se janë në gjendje t’u shërbejnë më së miri nevojave të tyre. Qeveria ka mbështetur pushtetin vendor me disa mjete të reja financiare dhe gjithashtu ka shtuar dispozita të reja në lidhje me transparencën dhe llogaridhënien e bashkive me projektligjin e fundit”, tha kryeministri grek, Mitsotakis.
Ndërsa kryetari i ri i partisë më të madhe opozitare, Siriza, Stefanos Kaselakis, e nisi ditën e zgjedhjeve me një akuzë në rrjetet sociale, duke mohuar të ketë qenë republikan i djathtë në karrierën e tij të mëparshëm në Amerikë.
“Shihni çfarë bëjnë pistoletat e ekstremit të djathtë në ditën e zgjedhjeve! Më tregojnë si republikan. I cili në fakt në vitin 2023, teksa po diskutonte me SYRIZA-n në Greqi, firmoste për partinë Republikane në SHBA! Madje dokumenti i tyre ka edhe adresë false. Unë po ju jap si gjithmonë të vërtetën. Vendos të dhënat e mia reale dhe sistemi nuk më tregon të regjistruar në asnjë palë. Por nuk dua të fshihem. Unë kam mbështetur hapur Partinë Demokratike dhe Obama-Biden që nga viti 2007. Dhe donacionet e vogla që kam bërë kanë qenë gjithmonë për Partinë Demokratike”, tha kryetari i Siriza, Stefano Kaselakis.
Ndërsa lideri tjetër i opozitës, Andrulakis i partisë tradicionale të majtë, PASOK, votoi në Hania të Kretës.
Në këto zgjedhje vendore në Greqi, sipas statisikave, është shënuar një rekord i ri, pasi 2% e popullsisë, apo 151 mijë e 766 qytetarë janë kandidatë, 64 mijë për këshilltarë komunalë, po kaq për këshilltarë bashkiakë dhe mbi 80 mijë për komunitete komunale.
Por ata që synojnë postet e kryetarit, në Bashki dhe Rajon, duhet të marrin më shumë se 43% të votave, ose shkojnë në balotazh, pra rivotim të dielën tjetër.
5 muaj pas fitores bindëse të mandatit të dytë, Nea Demokracia paraqitet favorite edhe në këto zgjedhje vendore. Edhe në zgjedhje te 2019, partia e Mitsotakis triumfoi, por pritet të shihet se si do të votohet në zonat të cilat u prekën nga përmbytjet e muajit të kaluar. Ndërsa me interes të madh është Athina, ku kandidat për kryebashkiak është sërish nipi i Mitsotakis, Kostat Bakojanis që rrezikon të shkojë në balotazh.
