Nga Boldnews.al
Në qershor të vitit 2023, Policia e Shtetit lajmëronte Agjencinë e Prokurimit Publik se kishte gati një super tender për armatosjen e uniformave blu. Qeveria kishte akorduar një shumë prej 16 milionë eurosh për të blerë armatime dhe municione. Letrat u dërguan në APP, por diçka ndryshoi rrugës! Pas shpalljes së kësaj procedure, u ndryshua ministri i Brendshëm. Vendin e Bledi Çuçit e zuri Taulant Balla. Ndryshimi u bë në muajin korrik, disa javë pas procedurës.
Burime nga ministria e Brendshme i thanë BoldNews.al se ministri i ri filloi verifikimet e kësaj procedure. Në fakt, ka pasur gjithmonë dyshime se tenderi ka qenë i paracaktuar dhe se të gjitha këto para’ do të shkonin te një dorë. Disa persona me lidhje të forta politike kanë sjellë armatime në Shqipëri, kryesisht për policitë private por edhe për ushtrinë.
Biznesi filloi të lulëzonte kur në krye të ministrisë së Mbrojtjes ishte zonja Olta Xhaçka, ndërkohë që Xhaçka shkoi te ministria e Jashtme dhe influencoi që biznesi shqiptar të bashkëpunonte me firma të huaja, kryesisht italiane. Por, ndryshimet e verës sollën të tjera poste politike, duke ndryshuar edhe influencat. Dyshja Çuçi-Xhaçka u larguan, ndërkohë që të rinjtë duken se kanë preferencat e tyre. Ata fillimisht po “studiojnë” tregun dhe më pas pritet që të hidhen në veprim. Dhe, tenderin e majmë prej 16 milionë eurosh e kanë shfryrë në vetëm 4 milionë euro.
Sipas dokumenteve që ka siguruar redaksia e BoldNews.al, kjo “përplasje” duket se ka shkuar deri sipër në kupolën qeverisëse. Dhe duke qenë se “pazari” nuk është bërë me njerëzit e duhur, vlera e tenderit është ulur ndjeshëm. Janë hapur 4 lote tenderësh; armatime, armatime të gjata, municione dhe municione për armë të gjata. Në total, të katërta lote kanë shkuar në 372.685.875 lekë. Ose nëse do ti shtojmë TVSH-në dhe ti konvertojmë në euro, pak më shumë se 4 milionë euro. Por, nisur nga kjo vlerë me të drejtë na lindin disa pyetje; Përse tenderi i parë u shpall 16 milionë euro? Kush do t’i merrte 12 milionë eurot? Objektet e tenderit janë të njëjta, ndërsa vlera është ulur 4 fish.
Gjithsesi, në dokumente parashikohet se do të bëhet tenderi “blerje armë zjarri” i ndarë në 2 lote”, “blerje armë të shkurtra zjarri” dhe loti 2 “blerje armë të gjata zjarri”. Vlera e pritshme e kontratës është 241.639.875 lekë pa TVSH. Firmat duhet të paraqesin ofertë deri në datën 8 nëntor 2023.
Ndërkohë, i njëjti institucion prokurues ka hapur edhe tenderin me objekt “blerje municion dhe pajisje për përdorim policor”. Loti i parë “blerje municion” dhe i dyti “blerje pajisje për përdorim policor”. Fondi për të dyja lotet është 131,046,000 lekë.
Edi Rama armatos policët, tender 16 milionë euro për armë dhe municione
Pra, të katërta procedurat shkuan diku të 4 miionë euro. Ndërkohë, në investigimin e BoldNews.al në qershor të këtij viti, Policia e Shtetit njoftonte se kishte hapur tenderin me objekt “blerje armatim, municion dhe pajisje për përdorim policor”. Në atë kohë, autoriteti kontraktues ishte Agjencia Shtetërore e Prokurimeve të Përqëndruara, një institucion në varësi direkte të Kryeministrit Edi Rama.Pra, tenderi nuk do të bëhej nga Policia e Shtetit, por nga vetë Kryeministri.
Në dokument ishte shkruar se fondi limit i këtij tenderi është plot 1,635,506,605 lekë, ose e konvertuar në euro plot 16 milionë euro! Por, ngjarjet pasuan dhe tenderi nga “Rama” shkoi te i besuari i “Ramës” në ministrinë e Brendshme Taulant Balla, i cili duket se është zyrtari që ka përfituar më shumë nga ky ndryshim. Duke marrë karrigen e ministrit, Balla mund të ketë shfletuar dokumentet dhe ka pasur dyshimet e veta, duke “spiunuar” edhe kolegët Çuçi dhe Xhaçka, që të dy të larguar nga postet e tyre.
