Janë zbardhur detaje të reja nga ngjarja e regjistruar mbrëmjen e të hënë në rrugën “Siri Kodra”, ku një efektiv i forcave të posaçme “Shiponja” qëlloi me armë zjarri pistoletë në ajër, duke terrorizuar qytetarët.
Burime bëjnë me dije se efektivi protagonist i kësaj ngjarje është shtetasi Adrian Meta. Ky i fundit dyshohet se pas orarit të punës punonte dhe si truprojë apo shoqërues.
Mbrëmjen e 2 tetorit personi që ruhej nga efektivi pati një debat me një qytetar në rrugën “Siri Kodra”. Ky i fundit thirri disa të njohur të tij dhe në këtë moment ndërhyri efektivi i “Shiponjave” dhe qëlloi me armë në ajër.
Dyshohet se i riu është përfshirë edhe më herët në problematika të tilla, por çështjet janë mbyllur pa u publikuar. Ky rast është duke u ndjekur nga Agjencia e Mbikqyrjes Policore dhe Prokuroria e Tiranës.
