Edhe pse kanë kaluar gati 4 vjet nga tërmeti tragjik të ndodhur më 26 nëntor 2019, duket se pasojat vijojnë të jenë aktuale në kryeqytet.
Mijëra banorë të Durrësit, Krujës, Kurbinit, Tiranës apo zonave të tjera kanë konfirmuar më herët se procesi i Rindërtimit po ecën me ritme shumë të ngadalta, për të mos thënë s’po ecën fare.
Një rast i ngjashëm është publikuar edhe nga gazetari, Gjergj Erebara, i cili ka denoncuar një rast të dëmtimit të një pallati në Kombinat. Përmes një postimi në rrjete sociale, gazetari tregon përmes një fotoje, se prej tërmetit të 26 nëntorit 2019, ndërtesa as nuk është shembur por as nuk është riparuar.
Gazetari shprehet se të gjithë tenderët e rindërtimit të pallatit u bënë me procedura emergjente, por nuk është shfaqur asnjë urgjencë për riparimin e saj.
“Kombinat, 30 shtator 2023. Pothuajse katër vjet pas tërmetit të 26 nëntorit 2019, ky pallat i dëmtuar as nuk është shembur dhe as nuk është riparuar. Tê gjithë tenderët e rindërtimit u bënë me procedura emergjente, gjë që nënkupton, konkurrencë e ulët, çmime të larta por punime të shpejta. E megjithatë, kurrfarë urgjence nuk shfaqet për këtë pallat”, shkruan ai.
