Policia e Durrësit ka arrestuar mbrëmjen e kësaj të shtune 37-vjeçarin Aldo Mustafën, një person me precedent të mëparshëm kriminalë, pjesë e grupit të ‘Rrumit të Shijakut’.
Burime për mediat bëjnë me dije se ai është kapur në zonën e ish-kënetës bashkë me disa persona të tjerë, ndërsa gjatë kontrollit policia i gjeti edhe një armë zjarri që ai mbante pa leje.
Ky shtetas i shpëtoi një atentat me tritol më 3 prill të këtij viti në zonën e Shkozetit në Durrës. Një sasi e vogël tritoli, e vendosur në gomën e pasme të automjetit tip Golf 6, ka shpërthyer rreth orës 13:56, teksa në mjet po udhëtonte i vetëm Mustafa. Ai doli i pa lënduar nga shpërthimi ndërsa pak minuta para se të ndodhte ngjarja, la në banesë gruan me fëmijën.
Aldi Mustafa njihet si një person me precedentë penalë. Ai është arrestuar më 30 gusht të 2021 me dy të tjerë, pasi po planifikonin një vrasje. Aldi Mustafa, banues në Durrës, i dënuar më parë për veprat penale “Kanosja” dhe “Prodhimi dhe shitja e narkotikëve”, i dënuar më parë me 10 vite burg, në Gjermani, nuk është një emër i panjohur për policinë. Ndërkohë më 30 dhjetor të vitit të kaluar, me vendim të gjykatës i ishte shuar masa e arrestit me kërkesë të tij. Ai ishte dënuar me 2 vjet burgim pas arrestimit në gusht 2021 për mosbindje të urdhrit të policisë, armëmbajtje paleje dhe drejtim të parregullt të mjetit.
Mësohet se Mustafa më herët ka qenë anëtar i një bande të njohur në Durrës, ndërsa kohët e fundit ka pasur lidhje me Aleksandër Lahon i njohur si ‘Rrumi’, një personazh i përfolur në ngjarje kriminale, siç ishte dhe atentati ndaj ish-prokurorit Arjan Ndoja.
