Një ukrainase e cila prej një viti punonte në një lokal në Durrës, tregon se është dhunuar nga pronari i saj, Igli Çami, pasi ajo kërkoi pagesën e pagave të papaguara pas largimit nga puna.
Ngjarja ka ndodhur më 16 tetor 2025 dhe pas incidentit, ajo u shoqërua në komisariat ku i thanë të bënte ekspertizën mjeko-ligjore.
Për një javë zonja nuk mundi ta realizojë ekspertizën, pasi mjeku ligjor Anton Samarxhi nuk gjendej në vendin e punës. Pas ankesës së saj në emisionin “Stop”, mjeku Samarxhi tha se i duhet të mbulojë Durrësin, Kavajën, Rrogozhinën dhe Tiranën, ndaj nuk mund të jetë gjithmonë në një qytet. Ai deklaroi se do të hartonte raportin bazuar në gjetjet e një jave më pas, kur dëmtimet ishin më pak të dukshme për shkak të kohës së kaluar.
Qytetari: E kemi pasur për ta bërë më datë 17-të, po s’ke qenë ti. Po ka ardhur gjithë ato herë ajo goca o burrë. S’ke qenë ti. Ka qenë në datë 17-të, 18-të.
Mjeku: Unë punoj në Durrës, Kavajë, Rrogozhinë, Tiranë.
Qytetari: Po mirë tani, si t’ia marrësh shenjat ti asaj se ato i kanë ikur, shenjat?!
Mjeku: Unë çfarë duhet t’i bëj? Po personi, që është në Kavajë ose në Tiranë.
Qytetari: Vetëm një mjek ka Durrësi?
Mjeku: Jo vetëm Durrësi dhe një edhe Kavaja dhe një edhe Rrogozhina, edhe janë 7-të në të gjithë Shqipërinë edhe në Tiranë. Në këtë moment që flasim, Kristina, çfarë të dhemb?
Qytetarja: Gjuri më shumë më dhemb.
Mjeku: Nga ana ligjore unë, atëherë në momentin që kam shprehur atë, sepse unë atë gjë që nuk e kam parë, nuk mund të them dot, që…
Qytetari: Po ta kishim bërë që në datën 17-të ne, këtu do të ishin shenjat të dukshme, do të ishte më ndryshe raporti.
Mjeku: O zotëri! Ok! Dhe unë po të them që nuk ka qenë, nuk ekziston. A jemi në datën 24 sot?
Qytetari: Po!
Mjeku: Shumë bukur! Me ato që kam në datën 24. Unë në atë datë, mua më kanë caktuar, po themi të shkosh, të shikoj një Kristina tjetër. Atëherë të gjitha këto që më the Kristina, do t’i shkruaj dhe do t’i kthej përgjigje prokurorisë me shkresë.
Qytetari: Ti çon domethënë tani vetëm këto që pe sot?
Mjeku: Këto e kam për detyrë ligjore, t’i çoj patjetër. Po!
Një tjetër problem është edhe mosmarrja e pamjeve të kamerave të sigurisë nga lokali ku ndodhi dhuna. Oficeri i Policisë Gjyqësore, Endri Dushi, tha se është me leje dhe këtë procedurë ia ka lënë porosi oficerit të zonës, por ky i fundit deklaroi se nuk ishte njoftuar për asgjë.
OPGJ Endi Dushi: Jam me leje.
Qytetarja: Kur do të kthehesh?
OPGJ Endi Dushi: Pas 10 ditësh!
Qytetarja: Një pyetje kisha dhe kaq. Arsyeja ishte, telekamerat i keni marrë ju apo jo?
OPGJ Endi Dushi: Ia kam lënë të nesërmen oficerit të policisë që ka qenë i zonës. Mirupafshim!
“Stop” kontakton me shefin e zonës.
Qytetarja: Endri Dushi më tha se ka lënë një porosi për telekamerat e lokalit të Kënetës.
Shefi i zonës: Ku je ti?
Qytetarja: Unë jam këtu në Kënetë.
Shefi i zonës: Ca vendi?
Qytetarja: Në shtëpi.
Shefi i zonës: Po ku e ke shtëpinë, moj?
Qytetarja: Po si të ta shpjegoj ku e kam shtëpinë, afër lokalit e kam.
Shefi i zonës: Te cili lokal moj, s’e di unë lokalin ku e ke ti?
Qytetarja: Te “Çapaçulat” në Kënetë, kamerat e lokalit.
Shefi i zonës: Po, po kamerat te lokali, po unë nuk e di, se ku e ke lokalin ti.
Qytetarja: Nuk është lokali im, unë kam qenë punëtore dhe më ka dhunuar, më ka rrahur pronari.
Shefi i zonës: Po di unë, ku e ke lokalin ti!
Shefi i zonës: Jo! Endri Dushi s’më ka thënë gjë mua. Unë fola me Endrin, tha “s’i kam thënë gjë unë tha, as numrin s’ia kam dhënë unë”, tha.
Qytetarja: Po më tha mua Endri në telefon, se ia lashë në dorë shefit të zonës.
Shefi i zonës: Po!
Qytetarja: Të hapte lokalin…
Shefi i zonës: I ka Endri ata, i merr inspektori i krimeve. Megjithatë, unë do bisedoj me Endrin edhe çfarë do të më thotë Endri, do të të them.
/Emisioni “Stop”
