Është shtyrë për në datën 3 Tetor gjyqi ndaj deputetit Fatmir Mediu, në lidhje me çështjen e Gërdecit, i cili mbante postin e Ministrit të Mbrojtjes në atë kohë, në vitin 2008.
Mësohet se seanca e kësaj të premteje është shoqëruar me debate, sa i takon listës së dëshmitarëve dhe provave që dorëzuan palët.
Avokati i viktimave të veprave penale, Dorian Matlija, kërkoi kohë që të njihet me provat e mbrojtjes dhe dorëzoi një listë me 12 dëshmitarë. Sakaq avokati Henrik Ligori kundërshtoi pretendimet e avokatit Maltia duke argumentuar se nuk ka nevojë për një prokuror shtesë në këtë çështje. Në listën e dëshmitarëve të Dorian Maltias ishte dhe emri i Fiqiri Ismailit, ish-kryetari i bashkisë Vorë.
Gjykata pritet të shprehet në seancën e radhës për listën e dëshmitarëve.
Kujtojmë së ish-ministri i Mbrojtjes, Fatmir Mediu, kërkoi në fillim të muajit Shtator në Gjykatën e Posaçme Kundër Korrupsionit dhe Krimit të Organizuar, që të merren 90 dëshmitarë për llogari të procesit ndaj tij për çështjen e Gërdecit, mes tyre politikanë, gjeneralë amerikanë dhe të NATO-s, tetë ish-ministra jo vetëm të kabinetit Berisha, por edhe të kabinetit Rama. Ky vendim erdhi pas heqjes dorë për gjykimin e shkurtuar.
Vetëm një javë më parë, SPAK pranoi kërkesën e Mediut, por kërkoi marrjen në pyetje të 52 personave si dëshmitarë për çështjen “Gërdeci”.
