Kryeministri Edi Rama bëri një tjetër reagim sot mbi propozimin e tij për marrjen nën kontroll të veriut të Kosovës nga ana e KFOR, teksa foli dhe për “Republikë të KFOR-it”, edhe pse bëhet fjalë për një territor të Republikës së Kosovës, ndërsa “tentoi të fuste në sherr” dhe Vjosa Osmani me Albin Kurtin, duke shkruan se e njëjta është është bërë dhe nga ana e Presidentes së Kosovës. Por një pretendim i tillë është demantuar nga kabineti i Vjosa Osmanit.
Këshilltari për media i presidentes Osmani, Bekim Kupina, ka thënë për Telegrafin se ‘Presidentja Osmani në çdo bisedë dhe takim me partnerët dhe aleatët e ka sqaruar se mandati i KFOR-it, është vetëm si reagues i tretë dhe në mbështetje të Policisë së Kosovës si reagues i parë dhe institucioni kyç për sundimin e ligjit dhe sigurinë në secilën pjesë të territorit të saj’.
‘Institucionet e Kosovës kanë kërkuar mbështetje nga NATO-ja, që patrullimet në zonën kufitare t’i përfshijnë edhe ushtarët e NATO-s, përkrah policëve të Kosovës në mënyrë që të parandalohet hyrja e grupeve terroriste dhe sulmet nga Serbia. Policia e Kosovës ka mandat të plotë në të gjithë territorin e Kosovës, ndërsa me NATO-n, ka bashkëveprim dhe koordinim të ngushtë, siç e dëshmon edhe reagimi e operacioni policor gjatë sulmit terrorist në Banjskë më 24 shtator 2023’, ka thënë Kupina.
‘Pra, nuk bëhet fjalë për marrjen e kompetencave sovrane të institucioneve të sigurisë së Kosovës nga KFOR-i, por për mbështetjen e institucioneve të Kosovës në ndalimin e agresionit nga Serbia’, tha Kupina.
