Kreu i Partisë Demokratike, Sali Berisha ka reaguar për herë të parë pas humbjes së opozitës në zgjedhjet e pjesshme të 24 shtatorit në Kukës.
Berisha hodhi akuza të forta ndaj Ballës dhe Ballukut për të cilët tha se kanë shpërndarë para me thasë për të tjetërsuar votën e kuksianëve.
Sipas Berishës, janë dy mënyra që u përdorën nga 2 mijë patronazhistë për të blerë votat në Kukës.
“Çfarëdo që të bënte kandidati i opozitës Emri Vata ai kurrë nuk e realizonte dot fitoren. Në 2 mijë patronazhistë që janë të regjistruar në qarkun e Kukësit kanë tjetërsuar votën. Belinda Balluku dhe Taulant Balla kanë shpërndarë thasë me para 1 javë resht. Dy mënyra ka për të blerë votën. Njëra është blerja e votës dhe marrin kartën që mos votosh. Mënyra e dytë është të blen votën, të thotë do shkosh të votosh për PS dhe merr pagesën. Këtë e ndajnë në promocion të njëjtë në çdo qendër votimi. Me Edi Ramën unë garantoj çdo shqiptar që nuk do të ketë zgjedhje të lira”, tha fillimisht Berisha.
Kreu i PD shtoi se opozita e fitoi Bashkinë e Shkodrës në 6 mars sepse atëherë grupi kriminal i Bajrave ishte në burg dhe sipas tij, Rama i liroi para këtyre zgjedhjeve.
Sipas Berishës, Edi Rama do të qëndrojë në pushtet për një kohë shumë të gjatë nëse shqiptarët nuk e largojnë, pasi me atë në postin e kryeministrit nuk ka zgjedhje të lira.
“Shkodrën e fituam në 6 mars sepse Bajrët në 6 mars ishin në burg. Ky i liroi nga burgu. Safet Bajri ishte në burg me Tahirin, i nxori ai të gjithë dhe ata vunë Shkodrën në terror, bashkë me Pëllumb Gjokën. Enver Bajri me 6 makina të blinduara kalon nga një qendër votimi te tjetra. Do i shfaqim, kemi filmime. Opozita në 14 maj votoi 600 mijë kundër kësaj qeverie. Rama vetëm me zarfin prej 50 mijë lekësh dërguar 600 mijë pensionistëve, blerje publike votash.
Bashkë me rritjen e rrogave ai preku mbi 800 mijë votues. Partia e Tom Doshit u rrit 240 % nga 2021 deri tani. Nëse ne nuk largojmë Ramën, të garantoj që edhe në 2045 ai po të jetë gjallë, në pushtet do të jetë”, tha Berisha për Syri tv.
Denoncimet nga PD gjatë ditës së diel:
Ditën e diel, Partia Demokratike ka denoncuar praninë e personave të paautorizuar në qendrat e votimit në Kukës.
Me foto nga qendrat e votimit, PD ka nxjerrë pamjet e personave që sipas tyre pyesin dhe mbajnë shënim të gjithë emrat e atyre që votojnë, ndërsa theksojnë se ata nuk janë të autorizuar që të qëndrojnë pranë qendrave të votimit.
“Patronazhistët e Rilindjes sot (24 shtator) janë në krye të detyrës, edhe pse në kundërshtim me ligjin. Drejtorë shkollash, Hipotekës, apo dhe institucioneve të tjera, janë në krye të detyrës , për të devijuar dhe kontrolluar votat. Ata janë fotografuar në qendërat e votimit. KQZ e thotë qartë se nuk lejohen me kodin zgjedhor brenda ambienteve të qendrave të votimit. Ne do t’i paraqesim në OSBE-OHDIR faktet dhe provat, dhe në prokurori të gjitha këto raste të patronazhistëve. Pa zgjedhje të lira, nuk ka zgjedhje.”, denonconte Partia Demokratike ditën e zgjedhjeve.
