Brenda pak ditësh Korporata Elektroenergjetike Shqiptare ka përmbyllur 2 tenderë për blerjen e energjisë, teksa vlera e shpenzuar arrin në rreth 10 mln euro.
Sasia e energjisë së siguruar do të përdoret për plotësimin e nevojave konsumatore gjatë muajit shtator, ndërkohë që këto shpenzime i shtohen faturës për blerje energjie, që sipas përllogaritjeve të TV SCAN ka arritur në rreth 34 mln euro.
Në total, për vitin 2023 janë blerë rreth 313 mijë mWh energji, teksa çmimi mesatar arrin në gati 104 euro/mWh.
Ky ka qenë një vit i favorshëm për Korporatën, duke qenë se deri në muajin qershor situata hidrike ndikoi në rritjen e prodhimin e energjisë elektrike, duke bërë të mundur jo vetëm plotësimin e nevojave konsumatore, por edhe shitjen e energjisë.
Përmes procedurave të realizuar në periudhën janar – qershor KESH ka arritur të sigurojë të ardhura nga shitja e energjisë elektrike, ndonëse çmimi me të cilin shitej energjia mbetej më i ulët se në tregjet ndërkombëtare. Nga ky aktivitet, për periudhën 6 – mujore KESH arkëtoi rreth 41.5 mln euro.
Ndërkohë që, edhe çmimi me të cilin blihet energjia është ndjeshëm më i ulët se një vit më parë, për shkak se tregjet ndërkombëtare po shkojnë drejt stabilizimit dhe shumë pranë niveleve të parakrizës.
Gjithsesi, KESH vijon të kryejë procedurat e shit-blerjes së energjisë përmes faqes së saj online dhe jo në Bursën Shqiptare të Energjisë Elektrike, që ka disa muaj që është operacionale. Ky instrument i tregut u ngrit për të siguruar çmime transparente dhe më konkurruese të energjisë elektrike./SCAN
