Policia e Tiranës ka arrestuar një person, i cili u denoncua në emisionin “Stop”, pasi me anë të mashtrimit, duke u prezantuar si funksionar shtetëror, kishte përvetësuar shuma të konsiderueshem parash nga një grua.
Në pranga është vënë shtetasi Vebi Brahimaj, banues në Tiranë, i cili akuzohet për veprat penale “Mashtrimi” dhe “Përvetësimi i titullit apo i detyrës shtetërore”. Materialet i kaluan Prokurorisë pranë së Tiranës për veprime të mëtejshme.
Gruaja denoncoi se 10 muaj më parë, në Tetor të vitit 2022, i ka dhënë Vebi Brahimajt 10 mijë Euro, pasi e kishte njohur nga një rreth shoqëror dhe i ishte prezantuar si prokuror në SPAK dhe i premtoi, t’ia dyfishonte paratë për dy javë, pasi i duheshin për një tender të uniformave policore.
“Më ka prezantuar që punon në SPAK, është prokuror atje. 10 mijë Euro m’i mori dhe më tha përderisa njihemi pse mos t’i marrësh ti ato lekë domethënë. I duheshin për një tender që sapo kishte nisur dhe më tha që do t’i investoj atje. E vetmja gjë që më tha ishte që do të investonte në rroba policie dhe do të investonte 50 mijë në 4.5 milionë Euro që do të fitonte në tender”, tha denoncuesja.
Brahimaj e ngacmonte seksualisht gruan, por kur vinte puna te borxhi, vetëm i shtynte afatin. Në një komunikim me zonjën, Brahimaj pohon se është prokuror në SPAK, por kur gruaja i tha, se do të shkonte në këtë institucion, Brahimaj u shmang.
Në muajin Shtator denoncuesja erdhi në Tiranë për tek SPAK-u, nga ku edhe i dërgoi një video Vebiut. Por, ky i fundit zemërohet deri në pikën, që e kërcënoi me jetë dhe e shau me fjalët më të rënda.
