Gjykata e Vlorës i ka lënë në masën e sigurisë “arrest me burg” 6 anëtarët e një grupi të rrezikshëm kriminal, të cilët u arrestuan dy ditë më parë nga forcat RENEA, pasi dyshohet se do kryenin një ngjarje të rëndë kriminale.
Bëhet fjalë për shtetasit e arrestuar në kuadër të operacionit policor të koduar “Obelisk”, më konkretisht:
–Satilno Basho, 37 vjeç, banues në Vlorë, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
–Mariglen Aliaj, 33 vjeç, banues në Vlorë, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
–Bruno Shehu, 29 vjeç, banues në Vlorë, për veprën penale “Moskallëzimi i krimit”;
–Mehmet Hoxhaj, 27 vjeç, banues në Vlorë, për veprën penale “Moskallëzimi i krimit”;
–Beraldo Xhindi, 29 vjeç, banues në Vlorë, për veprën penale “Moskallëzimi i krimit”;
–Kevin Metaj, 28 vjeç, banues në Vlorë, për veprën penale “Moskallëzimi i krimit”.
Satilno Basho dhe Mariglen Aliaj do të qëndrojnë nën masën e sigurisë “Arrest me burg pa afat”. Ndërsa, katër të tjerët Bruno Shehu, Mehmet Hoxhaj, Beraldo Xhindi dhe Kevin Metaj u është caktuar masa e sigurisë 45 ditë secili burg.
Në momentin e arrestimit ata kanë qenë të ulur në të njëjtën tavolinë në një lokal të qytetit bregdetar, në lagjen “Lef Sallata”, teksa shtetasve Santiliano Basho dhe Mariglen Aliaj ju gjetën dy armë zjarri pistoleta (“Glock” dhe “TT”), me fishekë në fole, të gatshme për qitje. Armët u sekuestruan me cilësinë e provës materiale, së bashku me 3 automjete që posedonin shtetasit e arrestuar, 2600 euro dhe 8 celularë.
Santiljano Basho, nuk është një emër i panjohur për drejtësinë shqiptare. Ai konsiderohet si një prej “të fortëve” të Selenicës, i dënuar në 2019 për ‘shtrëngim me dhunë për dhënie për dhënie pasurie’.
Santiljano është vëllai i Tesi Bashos, një person me rrezikshmëri të lartë, i dënuar në Itali me burgim të përjetshëm për vrasje dhe i dënuar me 10 vite burg në Shqipëri.
