Kryekomisoneri Ilirjan Celibashi u ka bërë thirrje partive politike që të fillojnë sa më shpejt nga puna për Reformën Zgjedhore.
Në një deklaratë për mediat, Celibashi tha se është e nevojshme të dëgjohet edhe zëri i KQZ dhe aktorëve të tjerë jashtë politikës dhe nuk duhet që partitë politike të kenë të gjithë të drejtën në procesin e administrimit të zgjedhjeve.
“Të fillojë dhe të përfundojë sa më shpejt reforma zgjedhore. Pol shqiptare të kuptojë që ka ardhur koha që reforma zgjedhore të jetë vërtetë serioze në kuptimin e asaj se ca duhet të reformohet te sistemi i zgjedhjeve, jo vetëm si mënyra e përkthimit të votave në mandateve, po ka nevojë sistemi i administrimit dhe menaxhimit të modernizohet dhe të ketë më shumë qartësi, transparencë. Ka nevojë të dëgjohet zëri i KQZ, por edhe aktorëve të tjerë jashtë politikë. Do duhet që të mos kenë vetëm partitë politike të gjithë të drejtën në procesin e administrimit të zgjedhjeve në nivelet e dyta dhe treta. Kjo është domosdoshmëri, shpresoj të ndryshojë në të ardhmen”, tha Celibashi.
Në lidhje me votën e emigrantëve, Celibashi deklaroi se Kuvendi i Shqipërisë e ka detyrim kushtetues që t’i japë zgjidhje brenda muajit dhjetor.
“Mbetet detyrim i Kuvendit që tejet çdo diskutimi që mund të ketë secili prej nesh për sistemin zgjedhor, është detyrim kushtetues që brenda dhjetorit të këtij viti duhet t’i japë zgjidhje çështjes së votimi nga jashtë. Do të duhet të vendosë me atë të drejtën e vetë që ka Kuvendi dhe partitë politike për të disponuar mbi këtë çështje. Duhet të zbatojmë vendimin e Gjykatës Kushtetuese sikurse edhe vendimin Kushtetueses që ka shfuqizuar disa paragrafë të dispozitave të Kodit Zgjedhor që lidhen me llogaritjen e mandateve dhe votën preferenciale. Mendoj se këtë e ka detyrim kushtetues kuvendi, për të tjerat është çështje e politikës, të vullnetit të aktorëve politikë. Mos zbatimi i Gjykatës Kushtetuese nuk është se sjell ndonjë sanksion, është moral sanksioni”, – tha kreu i KQZ.
