Pesë ditë nga zgjedhjet e parakohshme në Kukës, kreu i PD-së Sali Berisha tha se “kthesa” nga kjo bashki “është mesazhi më i fuqishëm për mbarë shqiptarët’.
Gjatë një takimi elektoral, kryedemokrati u shpreh se Kukësi është rrethi më i varfër në Europë dhe kjo sipas tij, për shkak të politikave që janë ndjekur nga mazhoranca.
Ai premtoi se opozita do të ndërtojë një politikë për të nxitur zhvillimin e turizmit në të gjitha zonat malore.
Teksa kujtoi taksën e “Rrugës së Kombit”, Berisha tha se “ne jemi për taksat e ulëta”, ndërsa kandidati i koalicionit opozitar Bashkë Fitojmë për Kukësin Emri Vata u zotua se me ardhjen e tij në krye të bashkisë, qytetarët nuk do ta paguajnë më taksën.
Më tej gjatë fjalës së tij, Berisha tha se vendi ka nevojë jetike për një kthesë, ndërsa shtoi se “kthesa nga Kukësi është mesazhi më i fuqishëm që banorët e këtij rrethi u dërgojnë mbarë shqiptarëve”.
“Le të jetë Kukësi stacioni ku ndalon rrokullisja e madhe e këtij vendi, ku ndalon shpërbërja e Shqipërisë, largimi masiv i shqiptarëve Me këtë rast dua të ftoj të gjithë biznesmenët e Kukësit këto ditë të japin të gjithë ndihmesën e tyre për fitoren e Emri Vatës. Ftoj të gjithë lumjanët, kuksianët kudo që ndodhen, në Tiranë, në Shkodër, kudo, Durrës, jashtë vendit, të vijnë dhe të votojnë në Kukës për të firmosur ndryshimin. Nuk e meritonte kurrë Kukësi, Safet Gjicin. Gjici ishte një kopje e shëmtuar e Edi Rramës. Nuk e njoh këtë tjetrin, por nuk meriton Kukësi përfaqësues të Edi Ramës dhe të Safet Gjicit. Ndaj dhe ju ftoj të angazhohemi për një kthesë nga Kukësi, që do jetë një kthesë e madhe për gjithë Shqipërinë”, përfundoi ai.
