Ka marrë fund arratia e 48-vjeçarit Eduart Kurti, i shpallur në kërkim për vrasjen e dy vëllezërve në Tiranë ngjarje e ndodhur në vitin 2012.
Blutë bëjnë me dije se lidhur me ngjarjen, Kurti është dënuar me burgim të përjetshëm nga Gjykata e Shkallës së Parë, dhe pas 11 vitesh në arrati është arrestuar në zonën e Ish-Fushës së Aviacionit, pasditen e kësaj të premte.
“Shërbimet e Sektorit të Forcës së Posaçme të Operacioneve Speciale dhe Kërkimin, në vijim të punës për lokalizimin, kapjen dhe vënien përpara përgjegjësisë penale të shtetasve të shpallur në kërkim, bazuar dhe në informacionet e siguruara në rrugë operative, për vendndodhjen e një shtetasi të shumëkërkuar nga Policia e Tiranës, organizuan dhe finalizuan operacionin policor të koduar “End”.
Si rezultat i këtij operacioni, në zonën e Ish-Fushës së Aviacionit, ditën e sotme, është lokalizuar, kapur dhe vënë në pranga shtetasi Eduart Kurti, 48 vjeç, banues në Tiranë.
Ky shtetas ishte shpallur në kërkim pasi Gjykata e Shkallës së Parë të Juridiksionit të Përgjithshëm Tiranë, e ka dënuar me burgim të përjetshëm, për vrasja me dashje, në rrethana të tjera cilësuese, pasi në vitin 2012, në Tiranë, 48-vjeçari, ka vrarë me armë zjarri dy vëllezërit, shtetasit I. H., 44 vjeç, dhe S. H., 41 vjeç:,- njofton Policia.
Ngjarja për të cilën është shpallur në kërkim dhe dënuar ka ndodhur në rrugën “Irfan Tomini” në 2012 në Tiranë, ku ai ka ekzekutuar me plumb në kokë dy vëllezërit Iglent e Sokol Haxhialiu, brenda makinës së tyre. Dy vëllezërit ishin pronarë të disa bizneseve në Tiranë dhe në Vlorë.
Në atë kohë ngjarja ndodhi pas një debati mes tyre për shkak të një borxhi.
