Mediat greke kanë publikuar pamjet e rëndë që tregojnë momentin e ekzekutimit të 39-vjeçarit shqiptar Brigen Limka, baba i tre fëmijë me origjinë nga Korça, nga 68-vjeçari grek Dhimitris Kutrumanis.
Ngjarja ndodhi mesditën e kësaj të premte në rrugën “Praxitelous 147” në Pire, Athinë, Greqi, teksa ku shqiptari punonte si roje parkingu.
Siç shihet edhe në video, grekut i kanë mjaftuar vetëm nëntë sekonda për t’i marrë jetën shqiptarit. Mes tyre kishte pasur një debat për vende parkimi, i cili sipas dëshmitarëve okularë ishte një ngjarje thuajse e përditshme, ku 68-vjeçari po debatonte jo vetëm me viktimën, por edhe me fqinjët e tjerë.
“Mbarova me ty, tani mbarova me ty”, thuhet se ka bërtitur sulmuesi sapo ka qëlluar 39-vjeçarin, duke treguar se sa i vendosur ishte për të vrarë.
Pas një përplasje verbale mes viktimës dhe autorit, 68-vjeçari është ngjitur në banesën e tij, ka marrë pushkën dhe ka zbritur në rrugë. 39-vjeçari nuk e ka parë teksa fshihej pas një makine të parkuar. Ai ka dalë para viktimës në dy metra, e ka befasuar dhe e ka qëlluar në fytyrë.
39-vjeçari fatkeq është rrëzuar përtokë në mes të rrugës. Në të njëjtën kohë, një makinë që do të parkonte bën mbrapa dhe largohet me drejtuesin e saj duke parë skenën, dhe e ka zënë paniku.
Megjithatë 68-vjeçari nuk “i ka dalë inati” vetëm me aq. Ai e gjuan karabinanë përsëri dhe qëllon përsëri në drejtim të viktimës e më pas niset menjëherë për në shtëpinë e tij.
Sipas një gruaje që ndodhej në mesditë pranë skenës së ngjarjes, autori nuk kishte as makinë dhe në fakt shfaqte sjellje obsesive dhe kishte një mosdashje të madhe për parkingjet.
“Mes tyre pati debat. Autori u ngjit në banesën e tij mori pushkën dhe pasi e qëlloi tha; “tani mbarova me ty”. Ai njeri kishte sjellje të çuditshme”, është shprehur një dëshmitare.
Gjithashtu një tjetër thotë se autori i vrasje shkaktonte shpesh probleme dhe debatonte me fqinjët edhe për gjëra të parëndësishme.
“Autori krijonte vazhdimisht probleme në parking. Shumë herë hidhej mbi makina dhe nuk ngrihej dhe sot mori pushkën dhe kishte një problem me parkimin sepse banonte pikërisht sipër. Ai jetonte vetëm. Viktima nuk ka qenë kurrë problem. E dëgjuam duke thirrur për ndihmë dhe më pas dëgjuam të shtënat. Ai thirri fëmijët nga parkingu ngjitur. Pati dy të shtëna. Njëra në kokë, tjetra në fytyrë. Viktima ka tre fëmijë të mitur. Ajo që pashë ishte tronditëse. Policia mbërriti pas dhjetë minutash. Autori ishte mbyllur në shtëpinë e tij”, tha një dëshmitar.
“Njëri zbriti nga pallati dhe qëlloi një person. Një punëtor parkingu. Ata duhet të kenë pasur ndonjë debat, sepse plaku ka zbritur me pushkë dhe e ka qëlluar dy herë në fytyrë. Jemi të tronditur. Burri kishte rënë përtokë i mbuluar me gjak. Ambulanca mbërriti pas një ore, por viktima me siguri tashmë kishte vdekur. Ne ende po dridhemi vërtet”, tha një dëshmitar tjetër.
