Një rrjet trafiku droge është shkatërruar ditën e sotme në Milano të Italisë. Mësohet se anëtarët kishin ngritur një treg droge që përfshinte të gjithë Italinë dhe që kishte lidhje me Shqipërinë dhe me Zvicrën. Hetimi çoi në pranga 24 persona nga të cilët 16 janë shqiptarë, 2 italianë, 5 marokenë dhe 1 tunizian.
Gjatë operacionit, rreth 200 karabinierë ushtruan 40 kontrolle, duke sekuestruar të ardhurat e veprimtarisë së trafikut të drogës, që kapin vlerën e qindra mijëra eurove. 1 italian dhe 2 shqiptarë u gjetën me sasi të mëdha droge duke bërë që të arrestohen në flagrancë. Ato arrestuan në territorin e tyre një italian me 6 kilogramë heroinë në makinë.
Më pas hetimet u kryen në bashkëpunim me autoritetet zvicerane dhe bënë të mundur zbulimin e strukturës së dy organizatave kriminale të drejtuara nga dy familje shqiptare, e para me mbiemër “Lusha” dhe e dyta me mbiemër “Goseni”. Të dyja kishin lidhje operacionale në Shqipëri ku bëhej ri-investimi i të ardhurave nga aktivitetet e trafikut të drogës. Baza e tyre ishte në Milano, por degët shtriheshin në të gjithë Italinë Veriore, por deri në Kalabri dhe Zvicër.
Trafiku i heroinës dhe kokainës bëhej kryesisht nëpërmjet autobusëve, korrierëve dhe kamionëve. Gjatë operacionit u sekuestrua 42 kg lëndë narkotike përfshirë heroinë, kokainë dhe hashash si dhe 40 kg lëndë përzierëse, 2 pushkë dhe gati 50 mijë euro cash. Gjithashtu u identifikua një apartament dhe një magazinë që përdoreshin si rafineri droge si dhe disa apartamente e garazhe që përdoren për ruajtjen e ngarkesave të drogës.
Në disa përgjime telefonike dhe ambientale rezultoi se disa anëtarë të njërit prej dy grupeve, mes tyre edhe njeriu në krye të grupit “Goseni”, menaxhonin në mënyrë të qëndrueshme dhe të organizuar një rrjet nxitjeje dhe shfrytëzimi prostitucioni. Bëhet fjalë për të paktën 20 vajza nga Evropa Lindore, të detyruara, me kërcënime dhe dhunë, të prostituohen në apartamentet e menaxhuara nga organizata kriminale dhe të vihen në dispozicion në faqet e takimeve online.
