Pesë persona janë arrestuar këtë të hënë nga Policia, pasi akuzohen për vepra të ndryshme penale.
Blutë bëjnë me dije se në pranga ka rënë një 31 vjeçar pasi gjatë kontrollit fizik, policia i gjeti një sasi kokainë, e cila u sekuestrua në cilësinë e provës materiale.
Një tjetër i ri, 24 vjeç, u ndalua pasi dyshohet se ka vjedhur biçikletën e një shtetasi të mitur. Një 37 vjeçar është arrestuar pasi drejtonte mjetin në gjendje të dehur duke u përplasur me një automjet të parkuar. Si pasojë, kanë mbetur të lënduar drejtuesja dhe dy pasagjerët që ndodheshin në mjetin e parkuar.
Gjithashtu në pranga ka rënë edhe një 22 vjeçar pasi ka ushtruar dhunë ndaj nënës së tij dhe ka dëmtuar orenditë shtëpiake të banesës së tyre. Në banesë u gjetën disa armë të ftohta (thika)që i posedonte 22-vjeçari.
Ndërsa një 27 vjeçare u kap duke drejtuar automjetin në gjendje të dehur.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
