Policia e Mirditës ka arrestuar dy persona, pasi në fshatin Shtuf u zbuluan dy parcela ku kultivoheshin 220 bimë kanabisi.
Të arrestuarit janë identifikuar si Preng Marku dhe Kristian Pima, ky i fundit me precedent penal për veprimtari të ngjashme.
Njëri prej tyre u kap në flagrancë në ambientin ku bimët po thaheshin për përgatitje për shitje. Uniformat blu asgjësuan pjesën më të madhe të bimëve me anë të djegies dhe sekuestruan 33.7 kilogramë kanabis që ndodhej në proces tharjeje.
“Seksioni për Hetimin e Narkotikëve i DVP Lezhë, në vijim të punës për goditjen e veprimtarive kriminale në fushën e narkotikëve, pas disa javësh hetime në drejtimin e Prokurorisë së Lezhës, ka organizuar dhe finalizuar në bashkëpunim me Sektorin Operacional, operacionin policor të koduar “Processing”.
Si rezultat i operacionit, u vunë në pranga shtetasit:
-P. M., 31 vjeç, banues në fshatin Shtuf;
-K. P., 31 vjeç, banues në fshatin Arrëz, Mirditë, me precedent penal për veprimtari kriminale në fushën e narkotikëve.
Gjatë operacionit, u zbuluan në territorin e fshatit Shtuf, njësia administrative Kaçinar:
-2 parcela ku ishin kultivuar 220 bimë narkotike cannabis sativa, të cilat u asgjësuan me anë të djegies, përveç një pjese të vogël që u sekuestrua në cilësinë e provës materiale;
-1 ambient që këta shtetas e kishin përshtatur për tharjen e bimëve narkotike dhe përgatitjen e tyre për shitje. Në këtë ambient u gjetën dhe u sekuestruan rreth 33.7 kilogramë lëndë e dyshuar narkotike cannabis sativa, në proces tharjeje, si dhe u kap në flagrancë shtetasi P. M.”, njofton policia.
