Kuvendi i Shqipërisë do të zhvillojë nesër në orën 14:00 seancë plenare ku pritet t’i jepet drita jeshile emërimeve të ministrave të rinj. Kështu ata do të marrin zyrtarisht drejtimin e dikasterëve që u është besuar nga kryeministri Rama.
Deputetët do të votojnë për shkarkimin nga detyra të ministres për Europën dhe Punët e Jashtme, Olta Xhaçka, të ministres së Arsimit dhe Sportit, Evis Kushi, të ministres së Bujqësisë dhe Zhvillimit Rural, Frida Krifca dhe të ministres së Shtetit për Standardet dhe Shërbimet, Milva Ekonomi.
Ndërsa për ministren e Shëndetësisë dhe Mbrojtjes Sociale Ogerta Manastirliu dhe ministren e Financave dhe Ekonomisë Delina Ibrahimajn pas shkarkimit, në të njëtën ditë do të votohet edhe kalimi në një tjetër post brenda kabinetit. Manastirliut i është besuar posti si ministre e Arsimit dhe Sportit, ndërsa Delina Ibrahimaj do të emërohet si ministre Shteti për Sipërmarrjen dhe Klimën e Biznesit.
Gjithashtu sipas rendit të ditës pritet të votohet Igli Hasani, ministër për Europën dhe Punët e Jashtme, Ervin Mete ministër për Ekonominë dhe Financat, Anila Denaj ministre e Bujqësisë dhe Zhvillimit Rural, Albana Koçiu ministre e Shëndetësisë dhe Mirëqënies Sociale, Arbian Mazniku, ministër Shteti për Pushtetin Vendor.
Votimi i fundit i Kuvendit, do të jetë përsëri për Ervin Meten, për lirimin nga detyra si drejtues i Autoritetit të Mbikqyrjes Financiare.
Hapi i fundit është betimi i ministrave e rinj përpara Presidentit të Republikës, Bajram Begaj.
