Një person është vrarë me armë zjarri në Vlorë mbrëmjen e kësaj të shtunë.
Viktima është identifikuar si Leartiad Keka, 41 vjeç.
Ngjarja ka ndodhur pranë bibliotekës së qytetit dhe dyshimet e para janë se kemi të bëjmë me një atentat të mirëmenduar me viktimën i cili është ndjekur nga autorët.
Dinamika
Sipas një rindërtimi paraprak të ngjarjes, referuar dhe në dëshmitë e dhëna në polici nga dëshmitarë, ka qenë një një automjet tip “Audi” i zi tip A6 me targa italiane që fillimisht ka përplasur viktimën i cili lëvizte me motoçikletë.
Pas përplasjes, 41-vjeçari ka tentuar të largohej në këmbë, ndërkohë nga mjeti tip “Audi” ka dalë një person i maskuar që ka qëlluar me armë zjarri ndaj Lekajt, duke e lënë të vdekur.
Më pas, atentatori është kthyer në mjet për tu larguar nga vendngjarja, ndërsa policia ka ngritur disa pika kontrolli.
Makina e djegur
Gjatë kontrolleve, efektivët kanë gjetur një makinë të djegur te hangarët e ish-fushës së aviacionit, ndërsa po verifikohet nëse ka lidhje me ngjarjen.
Në një njoftim paraprak të policisë së Vlorës lidhur me krimin thuhet:
“Rreth orës 21:50, në lagjen “28-Nëntori”, në rrethana ende të paqarta, është vrarë me armë zjarri shtetasi L. K., 41 vjeç. Nga kontrolli i zonës, në aksin rrugor “Kotë- Sevaster”, shërbimet e Policisë kanë konstatuar një automjet tip “Audi”, duke u djegur. Janë ngritur menjëherë pika kontrolli në hyrje/daljet e qytetit të Vlorës dhe në akset “Vlorë-Fier”, “Vlorë-Tepelenë” dhe “Vlorë-Himarë”. Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve. Grupi hetimor ndodhet në vendngjarje dhe në drejtimin e prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim identifikimin dhe kapjen e autorëve”.