Nga Boldnews.al
Leartiad Keka, 41-vjeçari i ekzekutuar mbrëmjen e sotme në Vlorë rezulton i akuzuar nga drejtësia për një vrasje në bashkëpunim të ndodhur 23 vite më parë.
Referuar një vendimi të Gjykatës së Lartë të vitit 2005 të siguruar nga “Boldnews”, krimi është shënuar më 18 Gusht të vitit 2000 te “Kthesa e Gushajve” pranë Llakatundit.
Në atë ngjarje, që sipas hetimeve të kohës ka qenë një tentativë grabitje, ka mbetur i vrarë Vendim Malaj, ndërsa si autorë janë arrestuar dhe dënuar Leartiad Keka dhe Fjodor Mezyraj, të cilët pas një sage të gjatë gjyqësore kanë fituar pafajësinë.
Ngjarja
Referuar rindërtimit të ngjarjes nga trupi gjykues, bazuar në dëshmitë e të pranishmëve: dy persona të maskuar dhe të armatosur i kanë dalë përpara automjetit tip “Benz” të shtetasit Julian Habili, me të cilin ishin duke udhëtuar dhe 4 persona të tjerë banorë të Llakatundit (midis tyre dhe viktima Vendim Malaj), duke i detyruar këta të ndalojnë, të zbresin nga makina dhe te qëndrojnë në pjesën e përparme të saj, me duart pas kokës, për t’i marrë të hollat që kishin me vete.
Ndërkohë që viktima ka kundërshtuar të zbatojë urdhërata e tyre, njeri prej personave te armatosur e ka kërcënuar, sharë dhe goditur me qytën e automatikut dhe me pas, kur viktima i është kundërpërgjigjur duke i kapur automatikun, personat e armatosur kanë shkrepur armët në drejtim të tij. Edhe kur viktima është rrëzuar përtokë, në një kanal buzë rrugës, personat e armatosur i janë afruar dhe e kanë qëlluar përsëri dhe si janë siguruar se ai kishte vdekur janë informuar për vendbanimin e tij, nga bashkudhëtarët e tjerë. Me pas, ata kane detyruar këta të fundit të kalojnë në anën tjetër të rrugës dhe të qëndrojnë aty pa lëvizur, deri sa personat e armatosur janë larguar nga vendngjarja me automjetin e të dëmtuarit Julian, të cilin me pas e kane braktisur.
Saga gjyqësore
Leartiad Keka dhe Fjodor Mezyraj janë arrestuar pas një dëshmie të një vajze 14 vjeçe, e cila ka pretenduar se ka qenë në shoqërinë e autorëve të dyshuar kur ka ndodhur ngjarja.
Gjykata e Vlorës, më 23.10.2003, ka deklaruar fajtorë të pandehurit Leartiad Keka dhe Fjodor Mezyraj për vjedhje me pasojë vdekjen në bashkëpunim duke i dënuar me 22 vjet burgim secilin. Ky vendim është lënë në fuqi nga Gjykata e Apelit, më 01.10.2004.
Megjithatë, mbrojtja e të akuzuarve ka ankimuar vendimin e Apelit në Gjykatën e Lartë duke argumentuar se dëshmia e të miturës nuk përputhem me atë të dëshmitarëve të tjerë, si dhe pozicioni nga ajo ka deklaruar se ka parë skenën e krimit (poshtë urës), nuk ka fushëpamje që e lejon. Në vendimin e Gjykatës së Lartë sqarohet se nga mbrojtja është kërkuar kryerja e eksperimentit hetimor, që është rrëzuar si në shkallën e parë ashtu dhe në Apel.
Në këto kushte, GJL ka vlerësuar se dy vendimet e mëparshme janë të dhënë bazuar në një hetim jo gjithëpërfshirës, pra vetëm në thëniet e 14-vjeçares, të cilat nuk përputhen me ato të të dëmtuarve. Po ashtu, vlerëson se rrëzimi i kërkesës për kryerjen e eksperimentit hetimor ka qenë i padrejtë. Me vendimin e vitit 2005, GJL ka vendosur kthimin e çështjes për rigjykim në Gjykatën e Apelit dhe kryerjen e eksperimentit hetimor.
Më tej, në vitin 2008, çështja është pushuar dhe autorët janë cilësuar të pafajshëm, për shkak të mungesës së provave që të vërtetojnë përfshirjen e tyre në krim.
