Autobusët e linjës urbane të “Unazës” në Tiranë, përfshihen sërish në aksident. Mbrëmjen e kësaj të marte, një autobus urban i “Unazës” së Nadir Çaushollit është përplasur me nj automjet rrugën “Bardhyl”. Fatmirësisht nuk ka pasur viktima.
Ndërkohë, nga pamjet e aksidentit duket se mjetet e aksidentuara kanë pësuar dëme të konsiderueshme.
Sipas njoftimit zyrtar nga policia, shkak i aksidentit është bërë një parakalim i gabuar nga një prej mjeteve. “Më datë 05.09.2023, në Rrugën Bardhyl, shtetasi R.M., duke drejtuar automjetin e tij, dyshohet se ka kryer parakalim të gabuar dhe është përplasur me një automjet të parkuar dhe me autobusin e linjës së Unazës, me drejtues shtetasin B.K. Si pasojë e përplasjes ka vetëm dëme materiale. Grupi hetimor ndodhet në vendngjarje dhe po punon për sqarimin e rrethanave të aksidentit”, njoftoi policia.
Aksidenti i sotëm është i disati i ndodhur muajt e fundit në kryeqytet, ku protagonistë famëkeq kanë qenë mjetet e kompanisë së Çaushollit. Dhjetra persona kanë mbetur të plagosur.
Në 27 Shkurt, në zonën e njohur si “Shallvaret”, urbani i linjës së Unazës shkaktoi një aksident masiv, duke përplasur disa makina e duke shkaktuar një duzinë me persona të plagosur. Pamjet e marra nga një kamera sigurie treguan si autobusi me shpejtësi të pazakontë përplasi një mjet tip “Audi” e më tej u shkaktua një aksident zinxhir.
Hetimet nxorën përgjegjës drejtuesin e urbanit i cili u arrestua për veprën penale të shkeljes së qarkullimit rrugor, ndërsa më pas i lirua nga gjykata që zbuti masën. Shefi i trafikut urban në Tiranë, Taulant Gjoka tha pas aksidentit se qëndron hipoteza që drejtuesi i autobusit mund të ketë pasur një patologji fizike.
Aksidenti i Shkurtit i kompanisë së Nadir Caushollit u parapri nga një tjetër ngjarje me disa të plagosur. Në 22 prill 2022, Në 22 prill 2022, një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut. Të paktën nëntë persona mbetën të lënduar, ndërsa çështja u pushua nga gjykata e Tiranës, pasi të dëmtuarit vendosën të tërhiqeshin nga ankimi.
Të tjera aksidente me bilanc jo kaq të rëndë kanë ndodhur më pas në kryeqytet, me protagonist autobusët e Unazës.
