Janë publikuar pamje të reja nga dhuna e ushtruar ndaj efektivit të Policisë, shtetasit E. F., dhe të afërmit tij shtetasit B. F. ngjarje kjo e ndodhur rreth orës 02:26 minuta të mëngjesit të 2 shtatorit, pranë banesës së policit, në sheshpushimin e një pallati në rrugën “Besim Alla” në kryeqytet.
Në pamjet e reja, dhuna nuk duket qartë për shkak të errësirë, por dëgjohen të bërtiturat dhe ulërimat e personave që dhunohen, ku iu përgjërohen autorëve që të ndalojnë. Pamjet janë filmuar nga banorë të zonës, të cilët kanë qenë dëshmitarë të ngjarjes.
“Të mbeta në dorë o Bekim”, dëgjohet duke thënë një prej të dhunuarve, i cili siç duket i drejtohet 31-vjeçarit Bekim Bulica. Ndërsa personi që filmon thotë: “E rrahën”.
Autorët i zunë pritë efektivit të policisë në sheshin mes pallateve, duke i bllokuar rrugën me automjete me targa angleze, dhe i dhunuan me dru bejsbolli, si dhe ju dëmtuan makinës. Edhe pse polici tentoi të largohej dhe të mbrohej, duke tentuar të fusë automjetin drejt një garazhi të pallatit, por aty agresorët i nxorën të dy nga makina dhe i dhunuan.
Për këtë ngjarje, Policia vuri në pranga shtetasin Blerim Bulica, 29 vjeç, banues në Tiranë, si dhe shpalli në kërkim shtetasit Besart Bulica, 35 vjeç, Shaban Bulica, 25 vjeç, Bekim Bulica, 31 vjeç, dhe Benard Aliaj, 34 vjeç.
Shkaku i sherrit dyshohet se ka qenë një borxh i pashlyer. Autorët e dhunës i kanë kërkuar një shumë parash të afërmit të efektivit, pasi pretendonin se borxhi dhe konflikti mes tyre ishte i vjetër. I arrestuari ka dëshmuar në Polici se e ka takuar disa herë të afërmin e policit për t’i marrë lekët, por nuk ishin sqaruar dhe kishin përfunduar në fyerje. Ai ka thënë se njiheshin prej kohësh, pasi janë nga zona e Kukësit.
Gjatë kontrollit në banesën e 29-vjeçarit Blerim Bulica, uniformat blu kanë gjetur jelekë antiplumb, veshje kamuflazhi si ato të forcave speciale angleze, dhe një shkop gome si ato të Policisë, dhe sasi lënde e dyshuar narkotike kanabis.
Gjatë sherrit policit i ka rënë pistoleta e cila është gjetur më vonë. Si pasojë e goditjeve që kanë marrë, polici dhe i afërmi i tij i janë dëmtuar dhe ndodhen në spital, jashtë rrezikut për jetën.
