Kreu i PD-së së së vulës, Lulzim Basha ka reaguar pas mbledhjes së Kuvendit Kombëtgar të thirrur prej tij, ku u miratuan disa ndryshime statutore që e blindojnë edhe më shumë pushtetin e tij në parti dhe jetëgjatësinë në krye të saj pavarësisht humbjeve, teksa e shpalli veten edhe kryetar të grupit parlamentar.
Në një postim në rrjetet sociale, Basha shkruan se pa qëndresën e anëtarëve dhe drejtuesve nga seksioni deri te kryesia e PD-së ne nuk do të ishim sot aty për të ndërtuar të ardhmen, që t’ju shërbejmë njerëzve.
Ai shton më tej se sot nisi ndërtimi i një PD-je moderne, parti e qytetarëve dhe anëtarëve dhe jo partinë e kryetarit. Basha shkruan se demokratët dhe Partia Demokratike do të jetë aty për të luftuar vetëm për të mirën e Shqipërisë dhe shqiptarëve
Postimi i plotë:
Pa qëndresën e anëtarëve dhe drejtuesve nga seksioni deri te kryesia e PD-së ne nuk do të ishim sot këtu për të ndërtuar të ardhmen, që t’ju shërbejmë njerëzve, që të hapen vende pune për të rinjtë tanë, që të rriten të ardhurat për familjet shqiptare, që ato të kenë arsim dhe shëndetësi më të mirë.
Për këtë nisim sot të ndërtojmë Partinë Demokratike moderne, partinë e qytetarëve dhe anëtarëve dhe jo partinë e kryetarit. Sepse kryetarët ikin e vijnë, por demokratët dhe Partia Demokratike do të jetë aty për të luftuar vetëm për të mirën e Shqipërisë dhe shqiptarëve! Mirënjohje për secilin prej tyre!
