Është zbardhur dëshmia e plotë e 21-vjeçres me inicialet N.N. të dhënë para grupit hetimor, e cila mbrëmjen e djeshme plagosi me thikë 68-vjeçarin Zef Paloka në fshatin Dejë të Vaut të Dejës.
Ajo ka pranuar autorësinë e krimit dhe ka rrëfyer ngjarjen ku ka deklaruar se i moshuari e ngacmonte seksualisht prej rreth 1 viti, derisa mbrëmjen e djeshme i shkoi afër shtëpisë duke tentuar të kryejë me të marrëdhënie seksuale me dhunë. 21-vjeçarja ka deklaruar se e ka goditur disa herë me thikë Zef Palokën, pasi nuk kishte rrugë tjetër.
“Prej një viti më ngacmonte në rrugë pasi jemi afër me banesa në të njëjtën lagje. Unë nuk ia kam kthyer asnjëherë. Mbrëmë më erdhi afër banesës dhe filloi sërish të më ngacmojë ndërsa bëri edhe veprime të turpshme përpara meje. E ndodhur në këtë situatë shkova në shtëpi dhe mora një thikë duke e goditur për t’u vetëmbrojtur pasi nuk kisha rrugë tjetër”, mësohet të ketë deklaruar autorja e dyshuar.
Në momentin e ngjarjes ajo ka qenë e vetme në banesë. Burime bëjnë me dije se edhe banorët e lagjes kanë qenë në dijeni të këtij konflikti mes 21-vjeçares dhe 68-vjeçarit pasi ky i fundit e ngaçmonte herë pas here.
Pas krimit, 21-vjeçarja është arrestuar nga Policia e Shkodrës, ndërsa i moshuari ndodhet në spital, jashtë rrezikut për jetën. Grupi hetimor nën drejtimin e Prokurorit po punon për sqarimin e rrethanave të sakta të ngjarjes dhe dokumentimin ligjor të këtij rasti.
