Kryetari i PD-së, Sali Berisha ka folur për ish-rivalin e tij Fatos Nanos, gjatë një konference për mediat nga selia blu.
Berisha u pyet nga gazetarët për një reagim lidhur me Nanon, i cili prej ditësh ndodhet i shtruar në spital, pas problemeve shëndetësore që ka shfaqur.
“Me gjithë sinqeritetin dhe me gjithë zemër, i uroj Fatos Nanos, shërim të shpejtë dhe të plotë. Ta kalojë këtë situatë jo të lehtë dhe të rikthehet në familjen e tij”, tha Berisha.
Më tej, ai u ndal dhe te reagimi i Ramës për Nanon disa ditë më parë.
“Nuk dua të shkoj më tej, se po të shkoj më tej, do të dënoja me ashpërsinë më të madhe fasadën e Jagos(personazh i Shkepirit – simbol i së keqes), se nëse kishte një Jago, Edi Rama ishte Jago i Fatos Nanos, të themi të vërtetën. Të të qajë Jagoja, Zoti është i madh, nuk kam çfarë them tjetër. Çfarë mirënjohje nga Rama për Nanon? Vetëm mirënjohje nuk ekziston për atë mbi tokë. Nuk ka moment fatkeqësie që Edi Rama të mos e përdorë për qëllime të veta. Kur përdor edhe të tjera, se nuk po hyj t’i numëroj. Se disa janë krime të mirëfillta në kodin e etikës medikale, etj me radhë. Ai përbën një Jago dhe e ka të qartë çdo socialist i vërtetë shqiptar, që ka pasur integritetin të mbetet socialist dhe të shndërrohet në rilindës. Rilindësit janë sekt i veçantë”, shtoi ai.
