Kreu i grupit parlamentar të PD-së, Gazment Bardhi, në një prononcim për mediat pas mbledhjes së konferencës së kryetarëve, deklaroi se grupi parlamentar i PD kërkoi që të diskutohej për problematikat e zgjedhjeve, çështje e mbetur pezull që prej muajit korrik, por kjo kërkesë u refuzua nga grupi parlamentar i PS.
Sipas Bardhit, socialistët kishin më shumë hallin e Asamblesë së tyre se sa atë të parlamentit apo të qytetarëve.
“Sot u mblodh konferenca e kryetarëve për të përcaktuar kalendarin e punimeve. Grupi parlamentar i Partisë Demokratike kërkoi që kjo seancë e parë të mos ishte ceremoniale, për shkak se gjatë gjithë kësaj periudhe ka çështje me interes të lartë publik dhe të kishim mundësi të realizonim atë që në fakt është një çështje e mbartur nga muaji korrik që lidhet me seancën e posaçme për problematikat e zgjedhjeve. Kolegët e mazhorancës nuk kishin hallin e zgjedhësve, i gjitha halli i tyre ishte te asambleja e PS e njoftuar në të njëjtën ditë. Hallet e Edi Ramës nuk duhet të jenë hallet e qytetarëve shqiptarë, ne jemi ën parlament për hallet dhe interesat e zgjedhësve., Kjo ishte çështja që na ndau, sigurisht nuk u pranua kërkesa jonë, sigurisht”,-tha Bardhi.
I pyetur nga gazetarët në lidhje me Kuvendin Kombëtar që ka thirrur ditën e nesërme Lulzim Basha, Gazment Bardhi tha se nesër nuk ka mbledhje dhe sipas tij, Partia Demokratike momentalisht është pa kryetar dhe se ky problem është një çështje e brendshme dhe se duhet të zgjidhet. Më tej ai bëri thirrje që deputetët e opozitës të gjejnë një zgjidhje dhe se luftën kryesore ata e kanë më Edi Ramën.
“Nuk kam dijeni se çfarë bën zoti Basha, ajo që di unë me siguri është që nesër nuk ka Kuvend Kombëtar të Partisë Demokratike. Secili deputet është i lirë të mendojë çfarë të dojë brenda kampit opozitar. Kjo duhet të jetë një çështje e brendshme e Partisë Demokratike. Unë nuk jam personi kompetent për të pranuar dhe për të përjashtuar nga Grupet Parlamentare deputetë. Për momentin nuk ka kryetar të Partisë Demokratike. Që konflikti të zgjidhet duhet që secili prej nesh të heq dorë nga interesat personale. Përballë nuk kemi një kundërshtar jo të lehtë, por një kundërshtar që sillet si mafje. Nëse ne jemi të pa aftë për të zgjidhur hallet brenda vetes imagjino çfarë mesazhi mund të dërgojmë”– u shpreh Bardhi.
