Agjencia e Mbikëqyrjes Policore ka zbardhur akuzat për drejtorin e Shërbimit Zjarrfikës në Cërrik, Artjon Taçi, dy vartësve e tij, një punonjësi të OSHEE-së dhe një punonjësi të Bashkisë së Cërrikut, të cilët u vunë në pranga nga policia me vendim të Gjykatës së Elbasanit.
Më konkretisht:
- Artjon Taçi, 36 vjeç, me detyrë Drejtor i Shërbimit Zjarrfikës në Bashkinë Cërrik, akuzohet për veprat penale “Ushtrimi i ndikimit të paligjshëm ndaj personave që ushtrojnë funksione publike”, dhe “Përdorimi i funksionit publik për veprimtari politike ose zgjedhore”;
- Armand Gjoka, 43 vjeç, me detyrë punonjës i Zjarrfikëses në Bashkinë Cërrik, akuzohet për veprën penale “Përdorimi i funksionit publik për veprimtari politike ose zgjedhore”;
- Adnand Xhelili, 33 vjeç, me detyrë punonjës i Zjarrfikëses në Bashkinë Cërrik, akuzohet për veprën penale “Përdorimi i funksionit publik për veprimtari politike ose zgjedhore”;
- Alban Shima, 35 vjeç, me detyrë Përgjegjës i OSHEE Cërrik, akuzohet për veprën penale “Përdorimi i funksionit publik për veprimtari politike ose zgjedhore”;
- Agiano Dinoshi, 34 vjeç, me detyrë specialist në bashkinë Cërrik, akuzohet për veprën penale “Falsifikimi i dokumenteve”.
Gjithashtu është shpallur në kërkim dhe shtetasit K.V., 64 vjeç, i dyshuar për veprën penale “Falsifikimi i dokumenteve”.
AMP njofton se hetimet në kuadër të këtij procedimi vazhdojnë me qëllim identifikimin e personave të tjerë të mundshëm të përfshirë në aktivitet të paligjshëm dhe vënien e tyre para përgjegjësisë penale.
Burime bëjnë me dije se ata akuzohen se në bashkëpunim me njëri tjetrin kanë dhënë vërtetime false për subjekte biznesi që kishin detyrime të pa paguara në bashkinë e Cërrikut. Ndaj pesë personave të arrestuar ka dyshime edhe për pjesëmarrje aktive në zgjedhjet lokale të 14 majit, në një kohë që ligji e ndalon angazhimin e punonjësve të administratës. Burime nga prokuroria e Elbasanit, bënë të ditur se hetimi ka nisur disa muaj më parë.
Shefi i zjarrfikëses së Cërrikut, Artjon Taçi është arrestuar edhe më parë nga policia pasi drejtonte mjetin në gjendje të dehur. Ai ra në pranga më 19 janar 2023, në qytetin e Cërrikut me akuzën “Drejtim i mjetit në mënyrë të parregullt në gjendje të dehur”, pasi u ndalua nga policia dhe ju bë testi i alkoolit, ku rezultoi në masën 2.0 mg/l, ndërsa në testin e dytë rezultoi me 1.225 mg/l.
