Kryeministri Edi Rama, me profesion piktor, veshi petkun e inxhinjerit dhe foli paraditen e kësaj të mërkure për rezervuarve nafte, pellgje, sonda, procese shpimi, në një konferencë të posaçme mediatike për atë që e konsideroi si “zbulimi më i rëndësishëm i 30 viteve” rezultatet e pritshme në fushën naftë-mbajtëse të Shpiragut.
Ai refuzoi të përgjigjej çdo interesimi tjetër mediatik dhe u acarua me gazetarët, të cilët injoruan “zbulimin e tij historik” për rezultatet në të ardhmen të naftës së Shpiragut, duke e pyetur për skandalet e prekshme dhe aktuale të inceneratorëve dhe koncesioneve në Shëndetësi.
Konferenca e Ramës kishte më së paku tre zhvillime kryesore, të cilat nuk lidhen aspak me “zhvillimin historik” të proklamuar nga kryeministri.
Zhvillimi i parë
– Rama deklaroi se testimet e kompanisë “Shell” kanë nxjerrë të dhëna premtuese për ekzistencën e rezervuarëve të naftës në zonën e Shpiragut.
Megjithatë kryeministri deklaroi se do të priten analiza më të thelluara kosto-përfitim. Këto do të përcaktojnë nëse çmimi i procesit të nxjerrjes së sasisë së naftës (të pritshme) do të jetë më i ulët se sa shitja e naftës së nxjerrë në treg.
Pra, zhvillimi i parë nga konferenca mbi 90 minuta është që, edhe nëse do të ketë naftë, nuk dihet nëse ia vlen kostoja për ta nxjerrë nga thellësia e tokës.
Zhvillimi i dytë
– Rama u pyet nga gazetarët e pranishëm se cilat do të jenë përfitimet e qytetarëve shqiptarë nëse konfirmohet ky “zhvillim historik”. Pra, a do të jetë më e lirë nafta që qytetarët shqiptarë do t’i hedhin mjeteve të tyre.
Kryeministri nuk ishte në gjendje që të jepte një përgjigje të qartë dhe të saktë. Ai foli për procese, marrëveshje e një mish-mash teknikalitetesh, të cilat, edhe nëse ka arritur t’i kuptojë vetë, nuk i sqaroi për qytetarët shqiptarë.
Pra, ky “zhvillim historik”, edhe nëse konfirmohet, nuk u hyn aspak në xhep qytetarëve dhe konsumatorëve shqiptarë.
Zhvillimi i tretë
Rama akuzoi paraardhësit e tij për kontratë dhe koncesione abuzive në të shkuarën, kur në qeveri ishte opozita e sotme, të cilat, sipas tij, nuk kanë sjellë asgjë positive për ekonominë shqiptare.
Por ai refuzoi me ngulm, këmbëngulje, kryeneçësi dhe arrogancë pyetjet për koncesionet abusive të qeverisjes së tij, të cilat kanë dërguar pas hekurave zyrtarë të lartë dhe të tjerë presin radhën.
Pra, “zhvillimi historik” i Ramës u shndërrua në një konferencë të shëmtuar mediatike, e cila nuk bindi as vetë kryeministrin dhe as ata që e ndoqën në këtë zheg vape.
