Nga Boldnews.al
Këshilli i Lartë Gjyqësor, një organ i ngritur pas “shkrirjes” së KLD-së së famshme, i cili shërben për emërime dhe etikën e gjyqtarëve, është kthyer së fundmi në “qeverinë” e gjyqësorit. Por, shpesh herë emërimet janë bërë për “qoka”, nepotike apo edhe të tjera probleme që janë hasur.
Në “sitë” janë vënë emrat e gjyqtarëve “jashtë partie”, ndërsa reforma e re gjyqësore vetëm sa i vuri kapakun gjithë dështimit të KLGJ-së. Çdo ditë, në të vetmen Gjykatë Apeli në Tiranë, shtyhen mbi 50 gjyqe për mungesë sallash, infrastrukture apo mjetet e tjera të nevojshme për kryerjen e një procesi gjyqësor. Por, në mungesë të sallave, pajisjeve, çfarë bën KLGJ-ja? Bën tendera me vlerë të madhe për të … gjurmuar avionët!
Një çmenduri me vete, pasi për çfarë i duhet të gjurmojnë, kur fare mirë janë institucionet e tjera ligjzbatuese që e kryejnë një procedurë të tillë.
Dokumenti i mësipërm është një tender i majmë që ka hapur qeveria e gjyqësorit. Natyrisht, reforma ka sjellë që ristrukturim të ri të të gjitha gjykatave, të cilat kanë shumë nevojë. Objekti i procesurës është “blerje pajisje elektronike”, teksa autoriteti kontraktues është Këshilli i Lartë Gjyqësor.
Fondi i procedurës është plot 144,250,000 lekë teksa tenderi do të bëhet në muajt në vijim. Në të njëjtin dokument shkruhet se “kërkohen kompjutera desktop, direct-access storage devices, monitorë dhe kamera dixhitale. Por, “qershia” mbi tortë e të gjithë këtij tenderi është kërkesa e fundit: shërbime instalimi të ekraneve dhe monitorëve, që tregojnë në kohë reale, nisjen dhe kthimin e avionëve në aeroporte.
Për çfarë i duhen KLGJ-së pajisje të tilla?! Cilin nga anëtarët, gjyqtarët do të monitorojë? Nga frika e ndonjë atentati në ajër apo për të kontrolluar lëvizjet e gjyqtarëve?
