“Mediat shqiptare dhe TikTok nuk flisnin për asgjë tjetër veç një grupi italianësh që ikën nga një restorant në Berat pa paguar. Pronari e minimizoi çështjen. Kur i thashë Giorgias, të gjithë qeshën. Ajo u mërzit dhe ai urdhëroi ambasadorin: “Shkoni dhe paguani faturën për këta budallenj, ju lutem, bëni një deklaratë! Italia nuk mund të humbasë respektin kështu”.
Ky rrëfim i kryeministrit Edi Rama për gazetën italiane “La Stampa”, ku u pyet për vizitën katërditore të kryeministres italiane Giorgia Meloni në Vlorë, bëri xhiron e rrjetit përtej Adriatikut.
Nuk vonoi as përgjigjia e Ambasadës italiane në Tiranë që ka nxituar të çojëë në vend fjalën e shefes së qeverisë në Romë, duke paguar faturën prej 80 euro që katër turistë italianë lanë pa paguar, duke ia mbathur pas darkës në Berat.
“Me kërkesë të kryeministres, Giorgia Meloni, kemi proceduar me shlyerjen e faturës së lënë të papaguar nga një grup turistësh italianë në një restorant në qytetin e Beratit. Italianët respektojnë rregullat dhe shlyejnë borxhet dhe shpresojmë që episode të këtij lloji të mos përsëriten”, thuhet në njoftimin e ambasadës.
Por, gjuha e përdorur nga Meloni për t’iu referuar bashkëkombësve të saj “që i morën fytyrën” në Berat dhe urdhri për selinë diplomatike që të shlyejë faturën, nuk i ka pëlqyer aspak një pjese të opozitës italiane.
Riçardo Magi, sekretar i partisë “+Europe” thotë se “nëse Giorgia donte të bëhej kampione e shpirtit italian, ia doli shumë mirë”.
Por, sipas deputetit, vendimi i Melonit përfaqëson “kufirin ekstrem të populizmit”.
“Asnjë nuk ndëshkohet, Giorgia paguan menjëherë. Pyes nëse ky rregull nga sot e tutje do të zbatohet edhe brenda territorit kombëtar dhe jo vetëm jashtë. Përballë të gjithë qytetarëve të ndershëm italianë që paguajnë faturën në restoranti”, shprehet ai.
