Kreu i PD-së së vulës, Lulzim Basha i është përgjigjur Edi Ramës, pas reagimit që ky i fundit bëri për kullën 58 katëshe “Mount Tirana” në qendër të Tiranës, ku i doli në mbrojtje të saj, duke hedhur poshtë të gjitha pretendimet se pas saj qëndron opozita, duke i konsideruar si konspiracione.
Rama nuk i ndali as ironitë duke e quajtur Bashën si një “derdimen i sapozgjuar, me bluzën e jeshilosur nga djersa e gjumit të stërgjatë, ama me flokët pikë, njësoj si në çastin kur u zhduk nën jorgan në hyrje të verës së shkuar”.
Ndërkohë, Basha në reagimin e tij në rrjetet sociale, i drejtohet Ramës se “atë që nuk e thotë dot me pak fjalë, nuk ka shans ta mbulojnë fjalët shumë e për lumë”. Sipas Bashës, mëqënëse Ramës, i duket mali i korrupsionit në qendër të Tiranës si një “mullar balte”, i propozon vetingun në politikë për të ndarë të vërtetën nga balta.
Reagimi i Lulzim Bashës:
Sa më shumë zgjatet lista e bashkëpunëtorëve të tij të ngushtë që janë në burg, arrati apo nën hetim për shkak të makutërisë me të cilën është mbrujtur qeverisja e tij, aq dhe më të gjata bëhen hartimet e Ramës. Por atë që nuk e thotë dot me pak fjalë, nuk ka shans ta mbulojnë fjalët shumë e për lumë.
Meqë mali i korrupsionit në qendër të Tiranës i duket si një “mullar balte”, ka një zgjidhje shumë të thjeshtë për të ndarë të vërtetën nga balta: Veting në politikë.
Kur është i mirë për gjyqtarët, prokurorët, policët, pse të mos jetë i tillë edhe për politikanët?!
Propozimi i Partisë Demokratike është në Parlament, mjafton vullneti politik për ta miratuar. Me këtë rast u kursejmë qytetarëve andrallat e njëpasnjëshme të cirkut 33 vjeçar, pas të cilave fshihet frika nga e shkuara e atyre që ndonëse e kërkojnë votën për t’i shërbyer njerëzve, i kanë shërbyer vetëm interesave personale dhe klientelës oligarkike.
