Është zbardhur identiteti i viktimë së atentatit të regjistrur pak pas mesnatës së kaluar në Kosovë. Mësohet se i vrarë ka mbetur shtetasi Nexhmedin Loshi, 39-vjeç.
Ngjarja ndodhi brenda një lokali në fshatin Runik te Skënderajt, ku dy persona të maskuar u futën brenda lokalit, ekzekutuan me armë zjarri 39-vjeçarin dhe më pas u larguan në drejtim të paditur. Si pasojë e të shtënave me armë zjarri mbetën të plagosur dhe tre persona të tjerë.
Lidhur me gjendjen shëndetësore të tre të plagosurve, ka folur për mediat kosovare drejtori i Klinikës së Ortopedisë, Gani Jashanica, i cili tha se njëri prej të plagosurve ka qenë në gjendje të rëndë dhe si pasojë e plagëve i është amputuar këmba.
“Njërit sipas ekipit kujdestar, në bashkëpunim me kirurgun vaskular, ia kanë amputu këmbën dhe dy të tjerë janë duke u trajtu ende në Emergjencë”, tha Jashanica.
Dy të plagosurit e tjerë, sipas drejtorit të Ortopedisë, kanë marrë plagë nga arma e zjarrit në gju dhe në shputën e këmbës dhe ata janë jashtë rrezikut për jetë.
“Gjendja e tyre është jashtë rrezikut për jetë, kanë lëndime në gju edhe në shputë”, tha më tej Jashanica.
Kjo është vrasja e tretë brenda javës në Kosovë.
Të premten e 4 gushtit, në kafenenë ‘Bon Vivant’ në Prishtinë, ka mbetur i vrarë, Kastriot Ramadani, ndërsa janë plagosur dhe janë lënduar 20 persona tjerë.
Po ashtu të hënën në lokalin ‘Coyote Lounge Bar’ në Klinë, i dyshuari Tush Frroku, për motive ende të panjohura ka shtënë me armë zjarri në drejtim të 47-vjeçarit, Anton Prela, i cili si pasojë e plagëve ka humbur jetën.
