Është arrestuar në aeroportin e Rinasit një person i shpallur në kërkim. Në pranga është vënë shtetasi Henri Gjapi 26 vjeç, banues në Tiranë.
26-vjeçari ishte shpallur në kërkim, pasi Gjykata e Shkallës së Parë e Juridiksionit të Përgjithshëm Tiranë, i ka caktuar masën e sigurisë “Arrest në burg”, për veprën penale “Vrasja nga pakujdesia”. Ai është kapur teksa po tentote të hynte në Republikën e Shqipërisë.
Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
Vrasja për të cilën akuzohet:
Mesnatën e 31 Marsit të këtij viti, Henri Gjapi u takua rastësisht rreth orës 02:00 Gentjan Taljan në rrugën “Vaso Pasha” në ish-Bllok. Të dy, në gjendje shumë të dehur, nisën të grinden me njëri-tjetrin pa asnjë shkak, pa pasur asnjë njohje më herët. Nga pamjet e kamerave të sigurisë ata shiheshin duke u konfliktuar më duar, ne momentin që Artur Gjolen, po ashtu i rastësishëm në vendin e ngjarjes, ndërhynë dhe mundohet t’i ndaj.
Pak çaste më vonë 46-vjeçari Talja humb ekuilibrin si në një gjendje të fikti dhe shembet në tokë. Në pamjet e kamerave shihej Talja teksa gjatë rënies godet me kokë bordurën e trotuarit. Menjëherë u dërgua në spital për ndihmë mjekësore bashkë me Gjapin.
Gentjan Talja u dërgua me urgjencë në spital dhe në orët e pasdites së të nesërmes pas krimit, gjendja e tij është rënduar dhe rreth orës 19:00 ka rënë në gjendje kome. Ai nuk është përmendur më dhe ka humbur jetën katër ditë më vonë, mbrëmjen e së martës së 4 prillit.