Nënkryetari i Komisionit Evropian Margaritis Schinas i ka dërguar një letër komisionerit për Zgjerimin e BE-së, Oliver Varhelyi, ku shpreh shqetësim në lidhje me çështjen Beleri.
Schoinas thekson se Shqipëria, një vend që synon integrimin në BE, duhet të përballet me pasoja nëse kryebashkiaku i zgjedhur Fredi Beleri vazhdon të pengohet të marrë detyrën. Ndër të tjera, në letër thuhet se arrestimi i Belerit një ditë para votimeve, interpretohet si frikësim i votuesve, dhe se mbajtja në qeli është një shkelje e procesit të rregullt ligjor.
Schoinas thekson se trajtimi i Belerit nga autoritetet shqiptare përbën shkelje të prezumimit të pafajësisë dhe pengesë të një përfaqësuesi të zgjedhur në mënyrë demokratike, i cili është anëtar i minoritetit etnik grek të Shqipërisë. Schoinas shton se përderisa çështja lidhet me rezolutën e BE të 2022 për Shqipërinë, në lidhje me pronat e minoritarëve etnikë grekë, nuk është e mjaftueshme vetëm të ndiqen zhvillimet, por duhen marrë masa.
Disa ditë më parë, SPAK njoftoi mbylljen e hetimeve për Belerin dhe kalimin e çështjes për gjykim.
