Një foto e postuar në rrjetet sociale tregon ish-ministrin e Brendshëm Saimir Tahiri në një tavolinë brenda qelisë së burgut bashkë me tre persona të tjerë, dy prej të cilëve janë Safet Bajri dhe Kelmend Balili – i njohur si “Eskobari i Ballkanit”.
Fotografia është publikuar nga Flamur Vezaj, gazetar i kronikës i cili tashmë jeton në SHBA, me diçiturën “Shoqnia e burgut dhe jo vetem”.
Ai shkruan se fotografia është shkrepur brenda një qelie në burgun e Kosovës në Lushnje pak muaj më parë dhe siç shprehet, “tregon shumë sidomos për pushtetin e kapur me bandat”.
“Ne krah te majte me syza, besoj e njihni ‘kampioni’ i luftes kunder krimit ish-ministri Saimir Tahiri! Perballe tij me bluze te bardhe, eshte ‘Eskobari’ i Ballkanit Kelmend Balili! Ne kohen kur Tahiri drejtonte ministrine jane bere dhjetra operacione per kapjen e tij por pa Suksese!! Ndoshta kjo miqesi ka pas efektin e saj! Nderkohe pas Balilit eshte drejtuesi i ‘bandes’ se Bajrave te Shkodres, Safet Bajri! Perballe tij nuk e njoh ate ‘kapon’ tjeter”, shkruan.
Më tej, ndalet te lehtësirat që përfitojnë në qeli të burgosurit VIP në shpërfillje të ligjit.
“Sic duket ne foto, po festojne dicka me vere e ushqime brenda qelise!! Ne burg eshte e ndaluar vera por nga fotoja duket se jane te pashqetesuar per kete fakt dhe dihet tashme qe nepermjet shisheve te koles futej vera ne burgje! E per ta kuptuar se sa serioze ka qene qeveria Rama per luften ndaj krimit, kjo foto tregon shume”, përfundon ai.
Safet Bajri (Rustemi) është liruar nga qelia disa muaj më parë. Në muajin Mars, një personazh i botës së showbizit postoi një foto krah tij, duke i uruar “mirëseardhjen”.
Në fillim të verës nga burgu u lirua para kohe edhe Saimir Tahiri.
Në një deklaratë për mediat, avokati i tij, Maks Haxhia tregoi se një person me precedent të theksuar kriminal, në momentin kur kishte dalë nga burgu, i kishte shprehur keqardhje Saimir Tahirit që vuante ende dënimin.
“Më vjen turp që dal unë nga burgu dhe rrini ju“, ishin fjalët, sipas avokatit Maks Haxhia, me të cilat ai i ishte drejtuar Saimir Tahirit. Në media u raportua më pas se bëhej fjalë për Safet Bajrin, me të cilin Tahiri shfaqet në këtë foto në qelinë e burgut.
