Policia e Librazhdit ka arrestuar ditën e sotme dy shtetas pasi janë kapur në flagrancë duke prerë pemë, në parkun kombëtar “ Shebenik”.
Blutë bëjnë me dije se të arrestuarit janë të moshës 57 dhe 27 vjeç, banues në fshatin Rrajcë.
“Shërbimet e Komisariatit të Policisë Librazhd, si rezultat i intensifikimit të kontrolleve, me qëllim parandalimin, evidentimin dhe goditjen e krimeve mjedisore, në bashkëpunim më inspektorët për mbrojtjen e pyjeve, kanë evidentuar dhe goditur një rast të prerjes së paligjshme të pyjeve, në fshatin Rrajcë, në vendin e quajtur “Gavadec”, zonë e mbrojtur e parkut kombëtar “Shebenic”.
Në vijim të veprimeve procedurale për këtë rast u arrestuan shtetasit 57 vjeç dhe 27 vjeç, banues në fshatin Rrajcë, pasi u kapën në flagrancë duke prerë pemë ahu, në zonën e mbrojtur të këtij parku”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprën penale “Prerja e paligjshme e pyjeve”, kryer në bashkëpunim.
