Inceneratori i Tiranës u ka marrë taksapaguesve 60 milionë euro deri më sot. Pas vënies nën sekuestro, pritet që gjykata të caktojë një administrator shtetëror, i cili do të bëjë menaxhimin e tij. Në MCN TV, gazetarja Ola Xama tha se SPAK duhet t’u shkojë deri në fund hetimeve, pasi mes përgjegjësve është edhe vetë Bashkia e Tiranës dhe kryebashkiaku Erion Veliaj.
“Nuk dua të jap gjykime personale, por mendoj se zoti Veliaj duhet të përgjigjet pse ka vënë firmën kur ministri ka qenë kundër. Firma e zotit Veliaj pa një vendim të Këshillit Bashkiak bie ndesh me ligjin e pushtetit vendor. Bashkia e Tiranës ka përgjegjësi sepse është paguar, është autoriteti që ka bërë pagesat duhet të kërkojë llogari pse nuk ka pasur incenerim. Me 29 euro për tonë, nuk i është thënë asnjëherë koncesionarit të ulë tarifën. Si ka mundësi që raportohen vlera të ndryshme investimi nga një vit në tjetrin. Nëse hetohet dhe SPAK ka vullnet t’i shkojë deri në fund, ka shumë përgjegjës dhe nga kjo nuk përjashtohet as Bashkia e Tiranës, e cila ka kërkuar dhe firmosur që të ketë incenerator në Tiranë”.
Xama tha se nëse inceneratori i Tiranës do t’u kishte kushtuar qytetarëve të kryeqytetit edhe 7 milionë euro të tjera deri në fund të këtij viti. Ajo shtoi se pyetja kryesore lidhur me inceneratorin e Tiranës është pse kjo vepër duhet të ndërtohej nga privati dhe të ketë partneritet me privatin.
“Ligji e thotë qartë: duhet të kushtojë më lirë. Argumentet pse kushton më lirë i ka bërë Klodian Zoto. Ai ka vendosur disa shifra dhe askush nuk i ka kontrolluar ato”.
Lidhur me mënyrën se si do të procedohet për menaxhimin e inceneratorit të Tiranës, Xama tha se ajo pritet të përcaktohet nga Agjencia e Pronave të sekuestruara.
“Duke qenë se inceneratori është nën sekuestro, caktohet një administrator nga gjykata. Nëse shohim rastin e Elbasanit, ka kaluar nën administrimin e bashkisë. Në rastin e Fierit, administratori kërkon 2 milionë euro që vepra të përfundojë. Tani mbetet që Agjencia e Pronave të Sekuestruara të dalë me një njoftim ku të shpjegojë si do të menaxhohet kjo vepër”.
