70 qytetarë nga Qarku i Elbasanit, të cilët i janë nënshtruar analizave të “check up”, janë thirrur këtë të mërkurë në SPAK për të dëshmuar.
Sipas raportimeve, hetuesit që po hetojnë dosjen në fjalë kanë qenë të interesuar të mësojnë mbi shërbimin, analizat, rezultatet dhe gjithçka tjetër që ka lidhje me një prej proceseve që prej vitesh, bazuar në akuzat publike, është cilësuar si korruptiv.
Nga dëshmitë e tyre, hestuesit kanë mësuar se në cilat qendra shëndetësore kanë marrë shërbimin dhe sa herë ata kanë përfituar nga “check up”. Mësohet se dëshmitë e personave do të ballafaqohen me të dhënat e dokumenteve apo deklarimet e zyrtarëve, për të parë nëse ka ose jo përputhshmëri mbi funksionimin apo ofrimin e shërbimeve, sipas kontratës.
Dosja e check up është regjistruar në SPAK më 18 shkurt të vitit 2020, ndërsa rreth 1 vit më parë janë marrë në pyetje nga prokurorja Elida Kaçkini dhe hetuesit e BKH-së, ish-ministri Ilir Beqaj, ish-zv.ministri Klodian Rrjepaj, ish-drejtori i shërbimit parësor spitalor Aurel Voda, si dhe ish-zyrtarë të tjerë që kanë dijeni mbi procedurat.
Për këtë çështje në SPAK ka depozituar padi PD dhe Nisma Thurrje, ndërkohë që janë akuzuar të paktën 10 persona mes të cilëve ish-ministri i Shëndetësisë Ilir Beqja, ministrja Ogerta Manastirliu, drejtues dhe ish-drejtues të Fondit të Sigurimit të Detyrueshëm të Kujdesit Shëndetësor dhe aksionerja e kompanisë përfituese të Check-Up, Vilma Nushi.
Në akuzat që janë ngritur nga opozita përfshihen korrupsioni aktiv e pasiv, shpërdorimi i detyrës apo përfitimi i paligjshëm.
Në kallëzim thuhet se ka prova dhe fakte për shkeljen e ligjit, në dy faza, në procedurën e dhënies në koncesion dhe përzgjedhjes së fituesit, si dhe zbatimin e kontratës.
Ministria e Shëndetësisë ka shkelur procedurat ligjore për shpalljen e fituesit dhe lidhjen e kontratës, ka shpallur fitues ofertuesin me çmimin më të lartë, duke sjellë dëm të lartë financiar për buxhetin e Fondit të Sigurimit të Detyrueshëm Shëndetësor dhe se procedurat koncesionare kanë qenë fikitive dhe fituesi ka qenë i paracaktuar.
Po ashtu, në kallëzim thuhet se zyrtarët e kallëzuar, edhe pse janë të detyruar me ligj, nuk kanë ushtruar kontrolle ndaj koncesionarit për të parë nëse respektohet afati i realizimit të analizave prej 3 orësh, janë ndërtuar 475 pika Check-Up dhe 20 laboratorë.
