Në kuadër të operacionit të koduar “Metamorfoza”, SPAK lëshoi 15 urdhër-arreste për personazhe të njohur të krimit, biznesit, drejtësisë dhe policisë, pas përgjimeve të ardhura nga autoritetete franceze, pas çkodimit të mesazheve në aplikacionet “Sky” dhe “Encro”. Ata akuzohen për disa vrasje dhe disa atentate të mbetura në tentatovë, teksa vetëm 6 pesona u arrestuan dhe 9 të tjerë janë shpallur në kërkim.
Mes personave të shpallur në kërkim është dhe 47-vjeçari nga Malësia e Madhe, Prekë Kodra, një emër i njohur për oponionin publik.
Një vit më parë, mediat kosovare, duke iu referuar raporteve të inteligjencës, raportuan se Prekë Kodra dyshohej për një plan për vrasjen e kryeministrit Albin Kurti, deputetit Xhavit Haliti dhe një komandanti të UÇK-së me emrin Ismet Haxha.
Sipas dokumentit të Njësisë Kundër Terrorizmit, roli i Prek Kodrës në serinë e atentateve që kishin për qëllim destabilizimin politik të Kosovës, ishte ai i atentatorit/vrasësit. Ai përshkruhej si person që dinte se si të përdorte edhe armën e zjarrit snajper.
Sipas planit, fillimisht do të vritej Ismet Haxha, dhe më pas Xhavit Haliti. Një muaj pas vrasjes së deputetit të PDK-së, do të vritej edhe Albin Kurti për t’u dukur si akt hakmarrjeje. Por, në deklaratat për mediat, Prekë Kodra i ka hedhur poshtë të gjitha këto akuza dhe se Albin Kurtin e ka parë vetëm nga televizori, ndërsa dy personat e tjerë nuk i njihte fare. Madje ai ka mohuar edhe faktin se është snajperist.
Mediat kanë raportuar dhe se Prekë Kodra është arrestuar dhe në verën e vitit 2011 pasi kishte penguar mbajtjen e zgjedhjeve lokale në Shalë të Shkodrës dhe se ishte simpatizant i njërës prej dy partive të mëdha në Shqipëri. Po ashtu, dyshohej edhe për lidhje të forta me mafien e Malit të Zi, me nipin e tij që pretendohet të jetë zënë me substanca narkotike dhe të ketë pasur probleme ligjore me këtë vend.
Në lidhje me aksionin e SPAK, “Metamorfoza”, nuk dihen detajet konkrete se për çfarë akuzohet Prekë Kodra dhe cili mund të ketë qenë roli i tij në ndonjë prej atentateve në veri të vendit.
